Qazaqstannyń eks-prezıdenti Nursultan Nazarbaevtyń úlken qyzy Darıǵa Nazarbaeva men onyń uly Nurálı Álıevke tıesili delinetin London shetindegi záýlim úı satylymǵa shyǵaryldy, dep jazady Azattyq. Bul týraly "Adyrna" ulttyq portaly habarlaıdy.
Winkworth rıeltor kompanııasynyń saıtynda jaryq kórgen habarlandyrýda úı týraly jan-jaqty maǵlumat berilgen. Tórt qabatty úı Londondaǵy jasyl jelekti aýdanda, Highgate golf-klýbynyń túbinde, adam aıaǵy baspaıtyn Denewood Road tuıyq jolynyń túkpirinde oryn tepken.
11 mln 800 myń AQSh dollaryna baǵalanǵan úıge eshqandaı quqyqtyq shekteý joq ekeni, erkin saýdaǵa shyǵarylǵany habarlanǵan. Úıdi satyp alý maqsatynda kórý úshin arnaıy formany toltyryp, baılanys telefonyńyzdy qaldyrýyńyz kerek. Saıtta úıdi ıpotekaǵa alýdyń joldary da qarastyrylǵan.
Habarlandyrýdan aýmaǵy 765 sharshy metr bolatyn úıdiń ár qabatynyń 3D kórinisin kórip, ár bólmesin jeke tamashalaýǵa bolady. Jeti jatyn bólmesi, tórt qonaq bólmesi men alty vannasy bar úıdiń fotogalereıasy da qosa berilgen. Úıdiń ishinde úlken basseın men bılıard ústeli bar, barlyq bólmesi qymbat jıhazben jabdyqtalǵan.
Saıttan úıdiń kartadaǵy ornalasqan ornyn, spýtnıkten qaraǵandaǵy kórinisin baıqaýǵa bolady.
"Adyrna" ulttyq portaly
