بالالار جىلىنا تارتۋ رەتىندە سىر ەلىندە “ەركەتاي” بالالار الاڭى اشىلدى

2047
Adyrna.kz Telegram

بار يگىلىك بالالارعا! پرەزيدەنت بەكىتكەن بالالار جىلى اياسىندا سىر ەلىندە ءتۇرلى دەڭگەيدە ءىس-شارالار باستاۋ الدى. وتكەن اپتادا وقۋشىلار ءۇشىن زاماناۋي وبسەرۆاتوريا مەن كينوستۋديانىڭ لەنتاسى قيىلسا، بۇگىن ايماق بۇلدىرشىندەرىنە ارناپ "ەركەتاي" بالالار الاڭى اشىلدى، دەپ حابارلايدى “ادىرنا” ۇلتتىق پورتالى.

ءاز-ناۋرىز مەرەكەسى ساتىندە وبلىس اكىمى گۇلشارا ابدىقالىقوۆا بالالاردىڭ ينتەللەكتۋالدى دامۋىنا ارنالعان ورتالىق ءا.تاجىباەۆ اتىنداعى وبلىستىق امبەباپ عىلىمي كىتاپحاناسىنا بارىپ، «بالالار كىتاپ الەمىندە»اتتى تانىمدىق ءىس-شاراعا قاتىستى.

ءوڭىر باسشىسى ايماقتىڭ باس كىتاپحاناسىندا ءبۇلدىرشىنوقىرمانداردىڭ كوركەم ادەبيەتتى قىزىعىپ وقىپ، كوڭىلدى ۋاقىت وتكىزۋ ءۇشىن جاسالعان كورمە بۇرىشتارى مەن ارنايى كابينەتتەردى كورىپ، زەيىنى ەرەك بالالارمەن تىلدەستى.

كىتاپحانا قورىنداعى بالالار ادەبيەتى جاس ەرەكشەلىگىنە قاراي بىرنەشە زالعا قويىلعان. ماسەلەن، «بالدىرعاندار» زالىندا مەكتەپكە دەيىنگى جانە باستاۋىش سىنىپ وقۋشىلارىنا ارنالعان تانىمدىق ەنتسيكلوپەديالار، ترانسفورمەر كىتاپتارى، الەم ەلدەرىنىڭ ەرتەگىلەر جيناقتارى بار. مۇنان بولەك، «كىتاپپەن بىرگە وسەمىز»، «اجەمنىڭ ەرتەگىلەرى»، «ەرتەگىلەر ەلىندە» جوبالارى اياسىندا الىنعان تۋىندىلار دا بەرىلەدى. ايماق باسشىسى «بالدىرعاندار» زالىندا بۇلدىرشىندەرمەن اڭگىمەلەسىپ، ولاردىڭ كىتاپ وقۋعا دەگەن ىنتاسى تۋرالى وي ءوربىتىپ، زەردەلى وقۋشىلارعا «ناۋرىز قالتا» سىيلىقتارىن تاراتتى.

«بالالار ادەبيەتى» زالىندا 8-14 جاستاعى وقىرماندارعا مەكتەپ باعدارلاماسىن يگەرۋگە كومەكتەسەتىن انىقتامالىق جانە وقۋ-ادىستەمەلىك ادەبيەتتەر قاراستىرىلعان. سونداي-اق، ءبولىم جانىنداعى «الاقاي» قۋىرشاق تەاترى مەن «ىسمەر» ۇيىرمەسى قىزمەت كورسەتۋدە. وقۋ ءبولىمىنىڭ جۇمىسىمەن تانىسقان وبلىس اكىمى قىزمەتكەرلەرىنە ساتتىلىك تىلەپ، كىتاپحانا ديرەكتورىنا بالالار كىتاپتارىنىڭ توپتاماسىن سىيعا تارتتى.

سونداي-اق، بالالار جىلى اياسىندا كىتاپحانادا ءتۇرلى-ءتۇستى اسەمدەپ بەزەندىرىلگەن «ەركەتاي» ويىن الاڭى اشىلدى. مۇندا بالالار ەركىن دەمالىپ، كىتاپ وقىپ، ۇستەل فۋتبولىن ويناپ، شاحماتپەن وي سەرگىتىپ, ءتۇرلى پازلداردى قۇراستىرىپ، مي تىنىقتىرا الادى.

”ادىرنا” ۇلتتىق پورتالى

پىكىرلەر