Bar ıgilik balalarǵa! Prezıdent bekitken Balalar jyly aıasynda Syr elinde túrli deńgeıde is-sharalar bastaý aldy. Ótken aptada oqýshylar úshin zamanaýı observatorııa men kınostýdııanyń lentasy qıylsa, búgin aımaq búldirshinderine arnap "Erketaı" balalar alańy ashyldy, dep habarlaıdy “Adyrna” ulttyq portaly.
Áz-Naýryz merekesi sátinde oblys ákimi Gúlshara Ábdiqalyqova balalardyń ıntellektýaldy damýyna arnalǵan ortalyq Á.Tájibaev atyndaǵy oblystyq ámbebap ǵylymı kitaphanasyna baryp, «Balalar kitap áleminde»atty tanymdyq is-sharaǵa qatysty.
Óńir basshysy aımaqtyń bas kitaphanasynda búldirshinoqyrmandardyń kórkem ádebıetti qyzyǵyp oqyp, kóńildi ýaqyt ótkizý úshin jasalǵan kórme buryshtary men arnaıy kabınetterdi kórip, zeıini erek balalarmen tildesti.
Kitaphana qoryndaǵy balalar ádebıeti jas ereksheligine qaraı birneshe zalǵa qoıylǵan. Máselen, «Baldyrǵandar» zalynda mektepke deıingi jáne bastaýysh synyp oqýshylaryna arnalǵan tanymdyq enıklopedııalar, transformer kitaptary, álem elderiniń ertegiler jınaqtary bar. Munan bólek, «Kitappen birge ósemiz», «Ájemniń ertegileri», «Ertegiler elinde» jobalary aıasynda alynǵan týyndylar da beriledi. Aımaq basshysy «Baldyrǵandar» zalynda búldirshindermen áńgimelesip, olardyń kitap oqýǵa degen yntasy týraly oı órbitip, zerdeli oqýshylarǵa «Naýryz qalta» syılyqtaryn taratty.
«Balalar ádebıeti» zalynda 8-14 jastaǵy oqyrmandarǵa mektep baǵdarlamasyn ıgerýge kómektesetin anyqtamalyq jáne oqý-ádistemelik ádebıetter qarastyrylǵan. Sondaı-aq, bólim janyndaǵy «Alaqaı» qýyrshaq teatry men «Ismer» úıirmesi qyzmet kórsetýde. Oqý bóliminiń jumysymen tanysqan oblys ákimi qyzmetkerlerine sáttilik tilep, kitaphana dırektoryna balalar kitaptarynyń toptamasyn syıǵa tartty.
Sondaı-aq, Balalar jyly aıasynda kitaphanada túrli-tústi ásemdep bezendirilgen «Erketaı» oıyn alańy ashyldy. Munda balalar erkin demalyp, kitap oqyp, ústel fýtbolyn oınap, shahmatpen oı sergitip, túrli pazldardy qurastyryp, mı tynyqtyra alady.
”Adyrna” ulttyq portaly
