سارقان اۋدانىندا «نۇرلى جەر» باعدارلاماسى اياسىندا سالىنعان 5 قاباتتى 50 پاتەرلى تۇرعىن ءۇيدىڭ كىلتى تابىس ەتىلدى.
«نۇرلى جەر» مەملەكەتتىك باعدارلاماسى اياسىندا سالىنعان جالگەرلىك ءۇيدىڭ لەنتاسىن اۋدان اكىمى تالعات قاناتۇلى قيىپ، سالتاناتتى تۇردە اشتى. بۇدان كەيىن، ءوڭىر باسشىسى جۇرەك جاردى لەبىزىن ءبىلدىرىپ، سارقاندىقتارعا پاتەر كىلتتەرىن تابىستاپ، قونىس تويلارىمەن قۇتتىقتادى.
كوپقاباتتى جاڭا تۇرعىن ۇيدەن اتا-اناسىنىڭ قامقورلىعىنسىز قالعان جەتىم بالاعا ون پاتەر، ءى، ءىى توپتاعى مۇگەدەك جانعا توعىز، مۇگەدەك بالانى تاربيلەۋشى وتباسىعا ون، كوپ بالالى جانۇياعا التاۋ، تولىق ەمەس وتباسىعا التى، زەينەتكەرگە بىرەۋ، اۋعان سوعىسىنىڭ ارداگەرىنە بىرەۋ، مەملەكەتتىك جانە بيۋدجەتتىك قىزمەتكەرگە التاۋ جانە تۇرعىن ءۇيى اۆاريالىق جاعدايداعى وتباسىعا ءبىر پاتەر بەرىلدى.
«مەن بۇگىن باسپانا كىلتىن الىپ، ۇلكەن قۋانىشقا كەنەلىپ وتىرمىن. وسى قۋانىشتى ءساتتى كوپ كۇتتىم. 10 جىلعا جۋىق جالدامالى ۇيدە تۇرىپ كەلدىم، بالالارىما ەشقانداي جاعداي بولمادى. ەندى جاڭا سەرپىنمەن، اق نيەتپەن كيەلى شاڭىراعىمىزعا كىرىپ وتىرمىن. وسىنداي قۋانىشتىڭ سەبەپشىسى بولعان اۋدان اكىمى تالعات قايناربەكوۆكە، وزگەدە ازاماتتارعا العىسىمدى ايتامىن»، - دەپ اعىنان جارىلدى جاڭا ءۇيدىڭ يەسى كوپ بالالى انا پەريزات قۇدياروۆا.
جاڭادان بەرىلىپ جاتقان تۇرعىن ءۇي زامان تالابىنا ساي جاساقتالىپ، بارلىق كوممۋنيكاتسيالىق جەلىلەرگە قوسىلعان. سونداي-اق، بالالار وينايتىن الاڭقايمەن قوسا اۆتوكولىك تۇراعى دا قاراستىرىلعان.
ايتا كەتۋ كەرەك، 5 قاباتتى 50 پاتەرلى تۇرعىن ءۇي جۇمىسىنا جالپى سومماسى 505,630 ملن. تەڭگە قاراجات بولىنگەن.
”ادىرنا” ۇلتتىق پورتالى
