“Amanat” پارتياسىنىڭ فرانكتسيا مۇشەلەرى پرەمەر-مينيستر ءاليحان اسحانۇلىنا دەپۋتاتتىق ساۋال جولدادى، دەپ حابارلايدى “ادىرنا” ۇلتتىق پورتالى.
“بۇگىنگى شيەلەنىستى حالىقارالىق جاعداي وتاندىق بيزنەس وكىلدەرىنىڭ مۇددەلەرىنە كەرى اسەر ەتۋدە.
شيەلەنىس ايماعىندا قازاقستاندىق كاسىپكەرلەرگە تيەسىلى 1007 جۇك ۆاگونى تۇرىپ قالعان، 680 جۇك ۆاگونى شيەلەنىس ايماعىنا جەتپەي توقتاتىلعان. جۇك ۆاگوندارىنىڭ ترانزيت قۇنى ەكى ەسەگە ءوسىپ كەتكەن.
لوگيستيكانىڭ بۇزىلۋىنا بايلانىستى ەۆروپادان ەلىمىزگە كەلەتىن تۇقىم، تىڭايتقىش، وسىمدىكتەردى قورعاۋ قۇرالدارىن جەتكىزۋ قيىنداپ كەتكەن.
اتالعان تاۋارلاردىڭ كوكتەمگى ەگىستىك جۇمىستارىنا تۇتىنۋعا قاجەتتى اۋقىمنىڭ 50-پايىزى عانا جەتكىزىلەدى دەگەن بولجاۋ جاسالۋدا. ال، يمپورتتان كەلەتىن وسىمدىكتى قورعاۋ قۇرالدارى ەگىستىككە قاجەتتىلىكتىڭ 90-پايىزىن قۇرايدى!
وتاندىق بيزنەس وكىلدەرى جۇزدەگەن ميلليون تەڭگە شىعىنعا ۇشىراۋدا. ۇكىمەت قيمىلداپ جاتىر، بىراق مىنا زاماندا وتە شيراق بولۋ ماڭىزدى!
انىقتالعانداي، ەلىمىزدىڭ بيزنەسى كوپتەگەن حالىقارالىق ساۋدا برەندىلەرمەن رەسەي ارقىلى جۇمىس ىستەگەن!
ول برەندىلەر كورشىمىزدەن جاپپاي شىعىپ جاتىر!
مۇناي تاسىمالداۋدىڭ دا پروبلەماسى قىلتيىپ تۇر!
نەگە ۇكىمەت كەزىندە مۇناي تاسىمالى، ساۋدا برەندىلەرىنىڭ بالاما لوگيستيكاسىن ويلاستىرماعان؟!
رەسەي ءرۋبلىنىڭ تەز بوساڭسۋى ءبىزدىڭ ەلىمىزگە كورشىمىزدەن ازىق-تۇلىكتىڭ يمپورتىنىڭ ەسەلەپ وسۋىنە الىپ كەلۋى مۇمكىن.
بۇل ءوز كەزەگىندە قازاقستاندىق ازىق-تۇلىك وندىرۋشىلەردىڭ جاعدايىن مۇلدەم تۇرالاتىپ جىبەرۋى ىقتيمال!
«جىعىلعان ۇستىنە جۇدىرىق» بولىپ حالقىمىزدى باعا مەن دەۆالۆاتسيا القىمنان قىسىپ جاتىر!
«امانات» پارتياسىنىڭ سايلاۋشىلارى وسى ماسەلەلەر بويىنشا الاڭداۋلى!
وسى تۇرعىدا:
1. قازاقستاننىڭ تاسىمال لوگيستيكاسىن ارتاراپتاندىرۋعا قانداي قادامدار جاسالۋدا؟
2. حالىقارالىق ساۋدا برەندىلەرىنىڭ قازاقستانمەن تىكەلەي جۇمىس ىستەۋىن قامتاماسسىز ەتۋ ءۇشىن نە ىستەلۋدە؟
3. مۇناي تاسىمالىن ارتاراپتاندىرۋعا قانداي ارەكەت جاسالۋدا؟
4. جالپى، تۋربۋلەنتتىك كەزەڭدە، قازاقستاننىڭ ەكونوميكالىق مۇددەلەرىن قورعاۋدىڭ جاڭا فيلوسوفياسى بار ما؟
وسى ماسەلەنى زاڭدا بەلگىلەنگەن مەرزىمدە قاراستىرىپ، جاۋاپ بەرۋىڭىزدى سۇرايمىز”.
قۇرمەتپەن،
قازاقستان رەسپۋبليكاسى
پارلامەنتى ءماجىلىسىنىڭ دەپۋتاتى،
«AMANAT» پارتياسىنىڭ فراكتسيا مۇشەلەرى
