وسىدان 4 جىل بۇرىن بانكير ەرجان تاتىشەۆتى ولتىرگەنى ءۇشىن سوتتالعان كاسىپكەر مۇراتحان توقمادي پرەزيدەنتكە ءىستى قايتا قاراۋدى سۇراپ اشىق حات جازدى، دەپ حابارلايدى “ادىرنا” ۇلتتىق پورتالى.
Stan.kz سايتىنىڭ مالىمەتىنشە، توقماديدىڭ ايتۋىنشا، ۇقك قىزمەتكەرلەرى ونى قورقىتۋ، ۇرىپ-سوعۋ، ازاپتاۋ، وتباسىنا مورالدىق-پسيحولوگيالىق قىسىم كورسەتۋ سونداي-اق شوتتارىن جاۋىپ، مۇلكىنە تىيىم سالۋ ارقىلى كىناسىن مويىنداتۋعا جانە ءىس جۇرگىزۋ كەلىسىمىنە قول قويۋعا كوندىرگەن.
توقمادي سول كەزدەگى ۇقك باسشىلىعىندا وتىرعان كارىم ءماسىموۆ پەن رۋسلان ىسقاقوۆتىڭ ماقساتى وپپوزيتسيونەر مۇحتار ءابىليازوۆتى تۇتقىنداۋ جانە قازاقستانعا ەكستراديتسيالاۋ بولعانىن ايتادى.
ءابىليازوۆ ءوزىنىڭ بۇرىنعى بيزنەس-سەرىكتەسى تاتىشەۆتى ولتىرۋگە تاپسىرىس بەرۋشى دەپ تانىلعان بولاتىن. ءىس ماتەريالدارى بويىنشا، ول مۇراتحان توقماديمەن كەلىسىمگە وتىرىپ، 2004 جىلى جەلتوقساندا تاتىشەۆكە اڭ اۋلاۋ كەزىندە ولتىرگەن.
"مەن 5 جىلدان بەرى جاساماعان قىلمىسىمنىڭ جازاسىن وتەپ كەلەمىن! ماعان جانە مەنىڭ جاقىندارىما كوپتەگەن ازاپ كەلتىرگەن وسى وقيعانىڭ بارلىعىن باس پروكۋراتۋرانىڭ، ءىىم-ءنىڭ، سوتتاردىڭ بەلسەندى تۇردە جاردەمدەسۋىمەن كارىم ءماسىموۆ باستاعان ۇقك قىزمەتكەرلەرى توبى ويلاپ تاۋىپ، ىسكە اسىردى. ولاردىڭ باستى ماقساتى مۇحتار ءابليازوۆتى ەكستراديتسيالاۋ بولدى. الايدا، ولار ءساتسىز اياقتالدى جانە وسى جىلدىڭ قاڭتارىندا ولاردىڭ بارلىعى قاماۋعا الىندى. سونداي-اق كوپتەگەن قىلمىستارى تۋرالى شىندىق بىرتىندەپ بەلگىلى بولا باستادى... ", – دەپ جازادى توقمادي.
ەسكە سالا كەتەيىك، 2007 جىلى توقمادي تاتىشەۆتىڭ ابايسىزدا قازا تاپقانى ءۇشىن راقىمشىلىق جاساۋ جازاسىنان بوساتىلا وتىرىپ، ءبىر جىلعا باس بوستاندىعىنان ايىرىلعان بولاتىن.
2017 جىلى سوت توقماديدى بوپسالاۋ جانە قارۋدى زاڭسىز ساتىپ الۋ، بەرۋ، وتكىزۋ، ساقتاۋ، تاسىمالداۋ نەمەسە الىپ جۇرگەنى ءۇشىن كىنالى دەپ تاۋىپ، ءۇش جىلعا باس بوستاندىعىنان ايىردى.
2018 جىلدىڭ ناۋرىز ايىندا ەرجان تاتىشەۆتى ولتىرگەنى ءۇشىن مۇراتحان توقمادي ون جارىم جىلعا سوتتالدى. ءابىليازوۆ سوت شەشىمىمەن سىرتتاي ءومىر بويىنا باس بوستاندىعىنان ايىرىلدى.
مۇراتحان توقمادي كەلىسىمدەرگە سايكەس وعان 5 جىل مەرزىم "ۋادە ەتىلگەن" دەپ وتىر. الايدا كاسىپكەر 10 جىلعا باس بوستاندىعىنان ايىرۋ تۋرالى ۇكىم شىعاردى. وسىدان كەيىن قول قويىلعان پروتسەستىك كەلىسىم ىستەن جوعالىپ كەتتى.
“ادىرنا” ۇلتتىق پورتالى
