وڭتۇستىك كورەيا اقش-تىڭ رەسەيگە قارسى سانكتسيالارىنان بوساتىلدى. ونىڭ ورنىنا ءدال وسىنداي دەڭگەيدەگى ەكسپورتتىق باقىلاۋ شارالارىن ەنگىزەدى، دەپ حابارلادى كورەيا رەسپۋبليكاسىنىڭ ساۋدا، ونەركاسىپ جانە ەنەرگەتيكا مينيسترلىگى.
وڭتۇستىك كورەيا وندىرۋشىلەرىن شەتەلدىك تىكەلەي ءونىم ەرەجەسىنەن (FDPR) الىپ تاستاۋعا تىرىسىپ كەلەدى. وعان سايكەس ولاردىڭ كومپانيالارى امەريكالىق تەحنولوگيانى پايدالانا وتىرىپ، شەتەلدە تاۋار وندىرەدى. سونداي-اق، رەسەيگە جونەلتپەس بۇرىن اقش-تان ليتسەنزيا الۋ كەرەك. ەرەجە جارتىلاي وتكىزگىشتەر، كومپيۋتەرلەر، لازەرلەر، بايلانىس جانە وسىنداي جەتى ساناتتاعى 57 ەلەمەنتتى قامتيدى.
وڭتۇستىك كورەيانىڭ ساۋدا ءمينيسترى يو حان گۋ 3 اقپان كۇنى ۆاشينگتوندا اقش ساۋدا ءمينيسترىنىڭ ورىنباسارى دون گرەيۆس جانە بايدەن اكىمشىلىگىنىڭ باسقا دا جوعارى لاۋازىمدى تۇلعالارىمەن بىرقاتار كەڭەس وتكىزدى. اقش وڭتۇستىك كورەيانىڭ رەسەي فەدەراتسياسىنا قارسى سانكتسيالارىن جوعارى باعالادى. سونداي-اق، حالىقارالىق قوعامداستىقتىڭ ارەكەتتەرىنە سايكەس كەلەتىنلىكتەن وڭتۇستىك كورەيا FDPR-دان ەرەكشەلىك الۋى مۇمكىن دەگەن قورىتىندىعا كەلدى.
“امەريكالىق تاراپ بىرنەشە كۇن ىشىندە وڭتۇستىك كورەيانى FDPR ەرەجەسىنەن شىعارىلعان ەلدەر تىزىمىنە قوسادى. وڭتۇستىك كورەيا ۇكىمەتى اقش پەن حالىقارالىق قاۋىمداستىققا سايكەس كەلەتىن دەڭگەيدە ەكسپورتتىق باقىلاۋدىڭ رەسەيگە قارسى قوسىمشا شارالارىن جۇزەگە اسىرادى»، - دەلىنگەن مينيسترلىك حابارلاماسىندا.
اگەنتتىكتىڭ پىكىرىنشە، بۇل وڭتۇستىك كورەيالىق كومپانيالار ءۇشىن «بەلگىسىزدىكتى» ازايتادى. ولار سانكتسيالارعا ۇشىراعان تاۋارلار ءۇشىن ەكسپورتقا رۇقسات الۋى كەرەك. بىراق ونى اقش-تىڭ ارالاسۋىنسىز وڭتۇستىك كورەيا ۇكىمەتىنەن الادى.
سونداي-اق، اقش ساۋدا مينيسترلىگى وڭتۇستىك كورەيا تاراپىنا وڭتۇستىك كورەيادا جاسالعان سمارتفوندار، قۇراستىرىلعان كولىكتەر، كىر جۋعىش ماشينالار جانە باسقا دا «تۇتىنۋ تاۋارلارى» FDPR-عا سايكەس كەلەتىنىن راستادى. الايدا ولار رەسەي فەدەراتسياسىنىڭ اسكەري قاجەتتىلىكتەرى ءۇشىن جەتكىزىلمەيدى.
“ادىرنا” ۇلتتىق پورتالى
