قوعام قايراتكەرى، اقىن ولجاس سۇلەيمەنوۆ نوبەل سىيلىعىنا ۇسىنىلدى، دەپ حابارلايدى “ادىرنا” ۇلتتىق پورتالى.
«1989 جىلى 8 اقپاندا كسرو-دا العاشقى قوعامدىق بىرلەستىك – «نەۆادا-سەمەي» حالىقارالىق انتيادرولىق قوزعالىسى (حقق) قۇرىلدى. اتالعان قوزعالىس قازاقستان حالقىنىڭ اتىنان يادرولىق سىناقتاردى توقتاتۋدى جانە يادرولىق قارۋدى جويۋدى جانە قازاق جەرىندەگى سەمەي يادرولىق پوليگونىنىڭ جابىلۋىن تالاپ ەتتى. قوزعالىستىڭ باستاماشىسى ءارى جەتەكشىسى – حالىق اقىنى ولجاس ومارۇلى سۇلەيمەنوۆ. «نەۆادا-سەمەي» ماد-نىڭ يادرولىق قارۋسىزدانۋعا قارسى باستامالارى بۇكىل الەمگە كەڭىنەن تانىمال!» – دەلىنگەن «بايتاق» حالىقتىق-ەكولوگيالىق پارتياسىنىڭ قازاقستان پرەزيدەنتى قاسىم-جومارت توقاەۆقا جولداعان ۇندەۋىندە.
«قازىر الەم ءۇشىنشى دۇنيەجۇزىلىك سوعىس قاۋپى مەن ىقتيمال يادرولىق تەكەتىرەستىڭ الدىندا تۇرعاندا، الەمدىك قاۋىمداستىققا قازاقستاننىڭ بەيبىتشىلىك باستامالارىن ەسكە سالاتىن ۋاقىت كەلدى».
«بايتاق» حالىقتىق ەكولوگيالىق پارتياسى سىزگە ولجاس ومارۇلى سۇلەيمەنوۆتى بەيبىتشىلىك سالاسىنداعى نوبەل سىيلىعىنا ۇسىنۋ تۋرالى باستامامەن ۇندەۋ تاستايدى! قۇرمەتتى قاسىم-جومارت كەمەلۇلى، ءبىزدىڭ باستامامىزعا جان-جاقتى كومەك پەن قولداۋ كورسەتۋىڭىزدى جانە قازاقستان رەسپۋبليكاسى سىرتقى ىستەر مينيسترلىگىنە نورۆەگيالىق نوبەل كوميتەتىنە جۇگىنۋ تۋرالى ءتيىستى بۇيرىقتار بەرۋىڭىزدى سۇرايمىز»، - دەلىنگەن ۇندەۋدە.
