ەلىمىزدىڭ بارلىق ايماقتارىندا تۇرعىندار پاتەر يەلەرى كووپەراتيۆتەرىنىڭ جۇمىسىنا قاتىستى سىني كوزقاراس تانىتادى. كوپقاباتتى تۇرعىن ۇيلەردى كۇتىپ ۇستاۋ جۇمىستارىنا ىقپال ەتىپ، كوندومينيۋم نىساندارىن باسقارۋ پروتسەسىن رەتتەۋ ماقساتىندا مەملەكەت باسشىسى بيىل مۇلىكتىڭ مەنشىك يەلەرى بىرلەستىكتەرى مەن جاي سەرىكتەستىكتەردى قۇرۋ بويىنشا تاپسىرما بەردى. الەۋمەت ءۇشىن وزەكتى جۇمىستاردى پىسىقتاۋ ماقساتىندا بۇگىن وبلىس اكىمى گۇلشارا ابدىقالىقوۆا مۇلىكتىڭ مەنشىك يەلەرى بىرلەستىگى ينستيتۋتىن ەنگىزۋ بويىنشا سەلەكتورلىق جيىن وتكىزدى.
وتىرىسقا اپپارات باسشىسى ەرلان رايعانيەۆ، قالا اكىمى عانيبەك قازانتاەۆ، سالالىق باسقارما مەن دەپارتامەنت باسشىلارى جانە ونلاين رەجيمدە اۋدان اكىمدەرى قاتىستى.
جيىن بارىسىندا ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى ەرلان جاڭاباەۆ مۇلىكتىڭ مەنشىك يەلەرى بىرلەستىكتەرىن قۇرۋ ىسىندە رەسپۋبليكا بويىنشا ءوڭىر جۇمىس قارقىنى كورسەتكىشى بويىنشا العاشقىلاردىڭ ءبىرى بولعانىمەن، ءالى دە جۇمىستى جانداندىرۋدى قاجەت ەتەتىنىن العا تارتتى. سونداي-اق، اۋداندار بويىنشا سالىستىرمالى تالداۋ جاساپ ءوتتى. ماسەلەن، قازالى، سىرداريا اۋدانىندا جۇمىسى ءالسىز جۇرگىزىلسە، قالعان اۋدانداردا جۇمىس مۇلدەم تومەن.
سونداي-اق، ەرلان جاڭاباەۆ بەلگىلەنگەن كەستە بويىنشا 1 شىلدەدەن باستاپ بارلىق بىرلەستىكتەر جۇمىسىن باستاپ كەتۋى كەرەكتىگىن العا تارتىپ، جۇمىستى جەدەلدەتۋ تۋرالى ۇسىنىسىن ورتاعا سالدى.
جيىن بارىسىندا قالا جانە اۋدان اكىمدەرى اتقارىلعان جۇمىس بارىسىن باياندادى. وڭىردە بارلىعى 1222 كوپقاباتتى تۇرعىن ءۇي بار، ونىڭ ىشىندە جۇيەسىمەن قۇرىلۋى قاجەت 914 كوپقاباتتى تۇرعىن ءۇيدىڭ بۇگىنگى تاڭدا، 909-ى قۇرىلدى بۇل جالپى جوسپاردىڭ 99,5% قۇرايدى. ونىڭ ىشىندە، قىزىلوردا قالاسىندا – 575 ءۇي، ارال اۋدانى- 42, قازالى اۋدانى - 106, قارماقشى اۋدانى- 56, جالاعاش اۋدانى- 21, سىرداريا اۋدانى- 29 ، شيەلى اۋدانى - 69, جاڭاقورعان اۋدانى - 16 كوپقاباتتى تۇرعىن ءۇي قامتىلدى. قالعان 308 كوپ پاتەرلى تۇرعىن ۇيگە كوممۋنالدىق مەنشىكتە بولۋىنا بايلانىستى باسقارۋ ۇيىمدارى تالاپ ەتىلمەيدى.
قازىرگى تاڭدا كوندومينيۋم وبەكتىسىنىڭ ورتاق مۇلكىن كۇتىپ-ۇستاۋ ءۇشىن اعىمداعى جانە جيناق شوتتارىن اشۋ، كوپ قاباتتى تۇرعىن ءۇي شىعىستارىنىڭ ەڭ تومەنگى مولشەرىن بەكىتۋ، كوممۋنالدىق قىزمەت كورسەتۋ ەرەجەسىن ەنگىزۋ جۇمىستارى جۇرۋدە.
كوپقاباتتى تۇرعىن ۇيلەردى باسقارۋ رەفورماسىن ەنگىزۋ باعىتىندا جۇمىستى سارالاعان ايماق باسشىسى 2022 جىلدىڭ 1 شىلدەسىنەن باستاپ قۇرىلعان مەنشىك يەلەرى بىرلەستىكتەرى مەن ءجاي سەرىكتەستىكتەر كەدەرگىسىز جۇمىسىن باستاۋى تيىستىگىن ەسكەرتىپ، ەرلان جاڭاباەۆقا اكىمدەرمەن بىرلەسىپ، ءتيىستى جۇمىستار جۇرگىزىلۋىنە اي سايىن مونيتورينگ جاساۋدى تاپسىردى. سونداي-اق، «ازاماتتارعا ارنالعان ۇكىمەت» كەاق مەن وبلىستىق ادىلەت جانە ستاتيستيكا دەپارتامەنتتەرىنە قۇجاتتاردى تەز ارادا راسىمدەۋگە ىقپال ەتۋ بويىنشا تاپسىرما بەردى.
