قىرعىزستاندا مەديتسينا ماماندارىن دايارلايتىن 17 جەكە وقۋ ورنى جابىلادى. بۇل جونىندە ازاتتىقتىڭ قىرعىز قىزمەتىنە دەنساۋلىق ساقتاۋ ءمينيسترى الىمقادىر بەيشەناليەۆ حابارلادى، “ادىرنا” ۇلتتىق پورتالى ازاتتىق راديوسىنا سىلتەمە جاساپ.
ول ءاربىر وقۋ ورنىنىڭ قىزمەتىن تەكسەرگەنىن جانە تەك تالاپتارعا سايكەس ءبىلىم مەكەمەلەرى عانا جۇمىس ىستەيتىنىن اتاپ ءوتتى.
ءمينيستردىڭ سوزىنە قاراعاندا، جەكە وقۋ ورنى يەلەرىنىڭ اراسىندا "وليگارحتار، دەپۋتاتتار مەن بۇرىنعى پرەمەر-مينيسترلەر" بار.
"قازىر بۇل بيزنەسكە اينالىپ كەتتى. مۇمكىندىگى بار ادامدار ينستيتۋتتار مەن ۋنيۆەرسيتەتتەر اشىپ العان. ول جاققا اقشا كوپ تۇسەدى. بىراق ءبىلىم ساپاسى ناشار. ءبىزدى 10-15 جىلدان سوڭ كىمدەر ەمدەيدى، سول جونىندە ويلاۋىمىز كەرەك. ءبىلىم الماي، ايتەۋىر جوعارى وقۋ ورنىن بىتىرگەن دارىگەرلەر بولاشاقتا ەلدىڭ گەنوفوندىنا وراسان زيان تيگىزەدى" دەدى مينيستر.
بەيشەناليەۆتىڭ سوزىنە قاراعاندا، ەلدە مەديتسينا ماماندارىن دايىندايتىن ءۇش مەملەكەتتىك جوعارى وقۋ ورنى بار: مەديتسينا اكادەمياسى، وش مەملەكەتتىك ۋنيۆەرسيتەتى جانە قىرعىز-ورىس سلاۆيان ۋنيۆەرسيتەتى. قالعانى – جەكەمەنشىك وقۋ ورىندارى.
ءمينيستردىڭ ايتۋىنشا، كەيبىر جەكەمەنشىك وقۋ ورىندارىنىڭ قىزمەتى تالاپقا ساي، سوندىقتان ولار جابىلمايدى. ول سونىمەن بىرگە جابىلاتىن وقۋ ورىندارىنىڭ ستۋدەنتتەرى سەرتيفيكاتسيادان وتكەن وزگە وقۋ ورىندارىنا اۋىستىرىلاتىنىن ايتتى.
ەلدەگى مەديتسينا فاكۋلتەتتەرىن تەكسەرگەن قىرعىزستان پرەزيدەنتى جانىنداعى جەمقورلىقپەن كۇرەس ىسكەرلىك كەڭەسى بىلتىر قىركۇيەكتە قورىتىندى ەسەپ جاريالاعان. اتالعان مەكەمە وقۋ ورىندارىنىڭ باسىم بولىگىندە مامانداردى كاسىبي دايارلاۋ ۇلكەن ماسەلە ەكەنىن جانە مۇنداي جاعدايعا نەگىزىنەن مامان دايارلاۋ ىسىندە بىرىزدىلىكتىڭ جوقتىعى اسەر ەتىپ وتىرعانىن العا تارتقان.
ىزىنشە مينيسترلەر كابينەتى جوعارى مەديتسينالىق ءبىلىم بەرۋ باعدارلاماسى بويىنشا ليتسەنزيا بەرۋگە ۋاقىتشا موراتوري ەنگىزدى. شەكتەۋ 2022 جىلدىڭ 1 قاڭتارىنان باستاپ 2023 جىلدىڭ 1 قاڭتارىنا دەيىن كۇشىندە بولادى. مينيسترلەر كابينەتى "بۇل جوعارى وقۋ ورىندارىندا بىلىكتى مەديتسينا ماماندارىن ازىرلەۋ ءۇشىن" جاسالىپ وتىرعانىن ايتقان.
“ادىرنا” ۇلتتىق پورتالى
