ەندى تاڭداۋ دوڭگەلەگى ارقىلى كونفليكتتەردى بولدىرماۋعا بولادى. وسىنداي شەشىمدى تالدىقورعان قالاسىنداعى نازارباەۆ زياتكەرلىك مەكتەبىنىڭ 3-سىنىپ وقۋشىسى ەۆا كاراپەتيانتس ۇسىنىپ وتىر.
جوبا XVII رەسپۋبليكالىق «زەردە» عىلىمي-زەرتتەۋ جۇمىستارى مەن شىعارماشىلىق جوبالار بايقاۋىندا ۇسىنىلدى. بايقاۋ بۋراباي اۋدانى، ششۋچينسك قالاسىنداعى «بالداۋرەن» رەسپۋبليكالىق عىلىمي-پراكتيكالىق ورتالىعىنىڭ بازاسىندا ءوتتى.
بۇل مودەل ويىن-ساۋىق كۆەست تۇرىندە بالالار اراسىنداعى جانجالدى جاعدايدى جويۋعا مۇمكىندىك بەرەدى. ءونىم سىنىپتاستاردىڭ پىكىرىن ەسكەرە وتىرىپ جاسالىپ، ولاردىڭ قولداۋىنا يە بولدى.
تاڭداۋ دوڭگەلەگى 7 بولىككە بولىنگەن شەڭبەر. ءار بولىكتە دوستىق ىزدەنىسى دەپ اتالاتىن قاقتىعىستى شەشۋ نۇسقاسى كورسەتىلگەن. دوڭگەلەككە جەبە بەكىتىلگەن، ول دوڭگەلەكتى اينالدىرۋ كەزىندە شەشىمدى كەزدەيسوق انىقتايدى. بۇل جانجالدى جاعدايدى ويىنعا اينالدىرۋدىڭ وتە قىزىقتى ءتاسىلى بولىپ تابىلادى، – دەيدى جاس زەرتتەۋشى ەۆا.
رەسپۋبليكالىق «زەردە» بايقاۋىندا 4-سىنىپ وقۋشىسى ەرالى شاكەربەك تە عىلىمي جوبا قورعادى. ەرالى بانان قابىعى سياقتى تاعام قالدىقتارىنان بيولوگيالىق ىدىرايتىن پوليمەرلەر الۋعا بولاتىنىن دالەلدەدى.
حيميا ءپانىنىڭ مۇعالىمى قارلىعاش قۇدايبەرگەنوۆانىڭ جەتەكشىلىگىمەن ەرالى پروتسەسستەردىڭ ءارتۇرلى كومبيناتسيالارىمەن بىرنەشە تاجىريبەلەر جۇرگىزىلىپ، ونىڭ بارىسىندا ەكى ايعا جەتپەي ىدىرايتىن ناعىز بيوپلاستيك الدى.
بىزدىڭ مەكتەپ اسحاناسىندا ايىنا ورتا ەسەپپەن 8 مىڭنان استام بانان جەلىنەدى. قورشاعان ورتانىڭ لاستانۋىن ازايتامىز دەسەك، «جاسىل» حيميا سالاسىندا يگى جولدى باستاۋ ماڭىزدى، مەن باناننىڭ قوسالقى ونىمىنەن الىناتىن بيوپلاستتاردى شىعاراتىن زاۋىت سالۋدى ۇسىنامىن. جاڭا ماتەريال شىن مانىندە ءداستۇرلى پلاستيكتى الماستىرا الادى. وزدەرىڭىز بىلەتىندەي، پلاستيكالىق لاستانۋ ادامزاتتىڭ وزەكتى ماسەلەلەرىنىڭ ءبىرى، - دەپ ەرالى شاكەربەك سۇحباتىن تۇيىندەدى.
«زەردە» قورىتىندىسى بويىنشا تالدىقورعان قالاسىنداعى زيتياكەرلىك مەكتەبىنىڭ وقۋشىلارى ەرالى شاكەربەك پەن ەۆا كاراپەتيانتستىڭ عىلىمي جوبالارى 1-ورىندى جەڭىپ الدى.
