الماتى وبلىسىنداعى تاس جولداردا بىلتىر 824 كولىك اپاتى ورىن الىپ، 264 ادام كوز جۇمعان. تاعى 1300-گە جۋىق جولاۋشى ءتۇرلى جاراقات الدى. وسى وقىس وقيعالاردى سارالاعان ماماندار جول اپاتىنا كوبىنەسە 25-35 جاس ارالىعىنداعى ازاماتتاردىڭ كوپ ۇشىرايتىنىن انىقتاپتى.
كولىك اپاتى كوپ جاعدايدا جىلدامدىقتى شامادان تىس اسىرىپ، ارا قاشىقتىق ساقتامايتىن جۇرگىزۋشىلەردىڭ كەسىرىنەن بولادى ەكەن. اسىرەسە قىس مەزگىلىندە اپاتتار جيىلەيدى. سوندىقتان جولعا جاۋاپتى ماماندار اق قار، كوك مۇزدا جولاۋشىلاردىڭ قاۋىپسىزدىگىن قامتامسىز ەتۋ ءۇشىن رەسپۋبليكالىق ماڭىزى بار جولداردى كۇنى-ءتۇنى باقىلاۋعا الدى. ياعني، «قازاۆتوجول» مەكەمەسى جىلىتىلاتىن جىلجىمالى ءۇش ۆاگون دايىندادى. بۇل قوزعالمالى بەكەت اۋا-رايىنىڭ قولايسىزدىعىنان جولدار جابىلعان ساتتە، جولاۋشىلاردى قۇتقارۋعا، جىلىتۋعا ارنالعان. سونداي-اق تايعاقتا سەبىلەتىن 88 تەكشە مەتر ينەرتتى ماتەريال جانە 86 توننا تۇز-قۇم قوسپاسى دايىندالعان. بۇدان بولەك وبلىستاعى ەڭ قاۋىپتى سانالاتىن كەگەن، ارقارلى، التىن-ەمەل، الاسا اسۋلارىنا مۇزعا قارسى قوسپالار جەتكىزىلدى. قىس مەزىگىلىندە جولداردىڭ تالاپقا ساي بولۋىن «جول اكتيۆتەرى ۇلتتىق ساپا ورتالىعىنىڭ» الماتى وبلىستىق فيليالى ءجىتى باقىلاۋىنا العان. جەلتوقسان ايىنان بەرى جولعا جاۋاپتى ماماندار 20 مارتە تەكسەرىس ۇيىمداستىرىپ، مۇزعا قارسى قوسپالاردىڭ ساپاسىن زەرتتەدى. ايتا كەتەيىك تەك سوڭعى ءبىر ايدىڭ وزىندە رەسپۋبليكالىق ماڭىزى بار جولدار اۋا-رايىنىڭ قولايسىزدىعىنا بايلانىستى 12 مارتە جابىلدى.
"ادىرنا" ۇلتتىق پورتالى
