9 اقپان 2022 جىل، «اق جول» دەموكراتيالىق پارتياسىنىڭ ءباسپاسوز قىزمەتى
قايعىلى قاڭتار كەزىندە اۋىر قىلمىستارعا قاتىسى جوق ۇستالعاندار بوساتىلۋ كەرەك. بۇل تۋرالى ءماجىلىس دەپۋتاتى بەرىك دۇيسەمبينوۆ «اق جول» فراكتسياسىنىڭ دەپۋتاتتىق ساۋالىندا مالىمدەدى.
قر باس پروكۋرورى
ع.نۇرداۋلەتوۆكە
بيىلعى جىلدىڭ 4-5 اقپانىندا ءماجىلىستىڭ ءبىر توپ دەپۋتاتتارىمەن قازاقستان رەسپۋبليكاسى قىلمىستىق-اتقارۋ كودەكسىنىڭ 32-بابى نەگىزىندە قاڭتار وقيعاسى كەزىندە ۇستالىپ، تەرگەۋ يزولياتورلارىنا قامالعان ازاماتتارمەن، ولاردىڭ تۋىستارىمەن كەزدەستىك.
بىزگە قاماۋعا الىنعانداردىڭ تۋىستارىنان ولاردىڭ ىستەرىن ءادىل قاراۋدى جانە جازىقسىزداردى بوساتۋدى سۇراعان 70-تەن استام ارىز ءتۇستى. ودان باسقا الەۋمەتتىك جەلىدە جاريالاعان جەكە تەلەفونىما دا كۇنىنە ونداعان ارىز شاعىمدار تۇسۋدە. ءوسىرىپ جەتكىزىپ، ەندى قىزىعىن كورەمىن دەپ وتىرعان بالالارىنان ايىرىلىپ، تۇرمەنىڭ تابالدىرىعىن توزدىرىپ، ەشكىمنەن پانا تابا الماي جۇرگەن انالاردىڭ اششى زارىن ەشبىر بريفينگتەن ەشقانداي مينيستر جەتكىزە المايدى. انالاردىڭ كوز جاسى مەن نالاسىن ءوز كوزىمىزبەن كورىپ، جۇباتۋعا ءسوز تاپپادىق.
ايتا كەتەرلىگى، ۇستالعانداردىڭ كەيبىرەۋلەرى جالپى توپتىڭ تولقىنىنا ىلەسىپ، زاڭسىز ارەكەتتەر جاساعانىن مويىنداپ تا وتىر.
بۇگىندە ولاردىڭ كوپشىلىگى وزدەرىنىڭ باسقا ماقساتتا پايدالانىلعانىن ءتۇسىنىپ، وكىنۋدە. اۋىر قىلمىستار مەن كىسى ولتىرۋلەر باستالعان كەزدە، الاڭداعى توپتى تاستاپ قايتىپ كەتپەك بولعانى، الايدا، بەلگىسىز بىرەۋلەر قارۋمەن قورقىتىپ، ولاردى تارتىپسىزدىك پەن توناۋعا ماجبۇرلەپ، كوپشىلىك اراسىنان شىعۋعا مۇمكىندىك بەرمەگەنى جايلى مىسالدار دا بار.
ءبىزدىڭ فراكتسيا 26 قاڭتارداعى دەپۋتاتتىق ساۋالىندا بەيبىت تۇرعىنداردى عيماراتتاردى قيراتقان بۇزاقىلار مەن كىسى ولتىرگەن قانىشەرلەردەن اجىراتۋدى ۇسىنعان بولاتىن. مەملەكەتتىك توڭكەرىس جاساپ، جۇزدەگەن ادامنىڭ ءومىرىن قيعاندار زاڭ تالابىنا ساي، قاتاڭ جاۋاپكەرشىلىككە تارتىلۋى ءتيىس.
مەملەكەت باسشىسى قاسىم-جومارت كەمەلۇلى توقاەۆ وسى قيىن ۋاقىتتا ەل تاعدىرى ءۇشىن بار جاۋاپكەرشىلىكتى ءوز مويىنا الدى. پرەزيدەنتتىڭ ساياسي ەرىك-جىگەرى مەن باتىل شەشىمىنىڭ ارقاسىندا عانا قازاقستان مەملەكەتتىلىگىن ساقتاپ، ەلىنىڭ تىنىشتىعىن قورعاپ، ادامداردى مال قۇرلى كورمەي، باستارىن كەسكەن لاڭكەستەردىڭ قۇربانىنا اينالمادى.
ارينە، مۇنىڭ بارىنە قۇقىق قورعاۋ ورگاندارى قالاي جول بەردى دەگەن سۇراقتار تۋىندايدى. بىراق، سولاردىڭ قاتارىنان سودىرلاردىڭ شابۋىلى كەزىندە العاشقى بولىپ، ءۇش جارىم مىڭ قارۋسىز قىزمەتكەر اياۋسىز سوققىعا جىعىلسا، جيىرماعا جۋىعى قازا تاپتى.
ال ولاردىڭ بارلىعى – ءوز ەلىمىزدىڭ ازاماتتارى ەمەس پە؟
بۇگىندە قوعام، ازاماتتارىمىزدى ءبولىپ جارىپ، ءبىر بىرىنە قارسى قويۋدى ەمەس، ەلدىگىمىزدى، تاۋەلسىزدىگىمىزدى قولداۋدى قاجەت ەتەدى. ءبىز تەرگەۋ يزولياتورىندا راديكالدى اعىم وكىلدەرىن دە كوردىك. الەۋمەتتىك جەلىلەردە تۇرعىن ۇيلەردىڭ تەرەزەلەرىنە اۆتوماتتان وق جاۋدىرعان، مەملەكەتتىك مەكەمەلەردى باسىپ كىرگەن، ادامدارعا شابۋىل جاساعان سودىرلاردىڭ لاڭكەستىك ارەكەتتەرى بەينەلەنگەن ماتەريالدار جەتكىلىكتى. ارينە، مۇنداي فاكتىلەرمەن تەرگەۋ اينالىسۋى كەرەك.
قۇقىق قورعاۋشى ايمان وماروۆا اتاپ وتكەندەي، لاڭكەستەردىڭ كوپشىلىگى ەلدەن شىعىپ ۇلگەرگەن كورىنەدى. بۇل ماسەلەمەن دە ءجىتى اينالىسۋ قاجەت. وسى رەتتە، شالىس قادام باسقان جاستارىمىزعا قاتىستى مەملەكەت تاراپىنان گۋمانيزم تانىتۋ قاجەت دەپ ەسەپتەيمىز.
بيىلعى جىلدىڭ 14 قاڭتارىندا بۇل تۋرالى پرەزيدەنت ق.توقاەۆ ءوزىنىڭ تۆيتتەرىندە «اۋىرلاتاتىن ءمان-جايلار بولماعان جاعدايدا، «جازانى جەڭىلدەتۋ» شارالارىن قابىلداۋ قاجەت» دەپ جازدى. بۇل ساليقالى دا ادامي كوزقاراس.
ادامداردى ولتىرۋگە جانە عيماراتتاردى تالقانداۋعا قاتىسى جوق ۇستالعاندار بويىنشا، قاجەت بولعان جاعدايدا، ولاردان ەشقايدا كەتپەۋ تۋرالى قولحات الىپ، ۋاقىتشا ۇستاۋ يزولياتورىنان بوساتۋ كەرەك دەپ سانايمىز. ۇساق زاڭبۇزۋشىلىققا جول بەرگەندەردى قىلمىستىق ىستەردى توقتاتىپ، اتا-انالارىنىڭ جاۋاپكەرشىلىگىمەن ۇيلەرىنە جىبەرىلگەنى ءجون.
سونداي-اق، تەرگەۋ يزولياتورىندا جاقىندا عانا بالالار ۇيىنەن شىققان، ىزدەۋشىسى جوق بىرنەشە جاس بالالار بار. ولار ءۇشىن، جازاسىن اۋىرلاتاتىن جاعداي بولماسا، مەن، ءوز اتىمنان، بوساتۋدى تالاپ ەتەمىن.
ال قاماۋدا قالاتىندارعا، تەرگەۋ بارىسىنا ارالاسپاي،
1) ازاپتاۋ مەن ۇرىپ-سوعۋدان قورعاۋدى;
2) جاراقات العاندارعا نەمەسە باسقا مۇقتاجارعا مەديتسينالىق كومەك كورسەتۋدى;
3) ادۆوكاتتىك قورعاۋدى قامتاماسىز ەتىپ، تەرگەۋ امالدارى كەزىندە قورعاۋشىلاردىڭ مىندەتتى تۇردە قاتىسۋىن تالاپ ەتەمىز.
بۇل جۇمىستى ۇيىمداستىرۋ ءۇشىن ءماجىلىس پەن سەنات دەپۋتاتتارىنىڭ اراسىنان جەدەل تۇردە پارلامەنتتىك كوميسسيا قۇرىپ، ونى تەز ارادا قاماۋدا وتىرعان الماتى، تاراز، شىمكەنت، قىزىلوردا، تالدىقورعان، اتىراۋ، اقتوبە قالالارىنىڭ تەرگەۋ يزولياتورلارىنا جىبەرۋدى ۇسىنامىز.
قۇرمەتپەن، «اق جول» فراكتسياسىنىڭ دەپۋتاتتارى
