بۇگىن قالا اكىمى مۇرات ايتەنوۆتىڭ قاتىسۋىمەن شىمكەنت قالاسى كاسىپكەرلەر پالاتاسى وڭىرلىك كەڭەسىنىڭ كەڭەيتىلگەن وتىرىسى ءوتتى. كەزدەسۋ بارىسىندا بيزنەس سالاسىنداعى ماسەلەلەر مەن ۇسىنىستار تالقىلاندى.
جيىندا ءسوز العان قالا اكىمى مەملەكەت باسشىسىنىڭ ەكونوميكانى ءارتاراپتاندىرۋ، يمپورتقا تاۋەلدىلىكتى بارىنشا ازايتۋ، قوعامدىق ءال-اۋقاتتى ارتتىرۋ سەكىلدى ماسەلەلەردى شەشۋ بويىنشا بەرگەن تاپسىرمالارىن تىڭعىلىقتى ورىنداۋ قاجەتتىگىن ايتتى.
- وتكەن جىلى بارلىق نىسانالى ينديكاتورلارعا قول جەتكىزىپ، قالامىزدىڭ الەۋمەتتىك-ەكونوميكالىق دامۋىندا وڭ ديناميكا بايقالدى. بۇل جىلعى مەجە ودان دا جوعارى. ەل دامۋىنداعى وڭ وزگەرىستەر بيزنەسپەن تىكەلەي بايلانىستى بولعاندىقتان ساياسي رەفورمالاردى بىرلەسە جۇزەگە اسىرۋ كەرەكپىز. مەملەكەت كاسىپكەرلىكتى دامىتۋ ءۇشىن قولايلى ورتا قالىپتاستىرىپ، كاسىپكەرلەر قوعامعا، حالىققا قىزمەت ەتسە، بۇل ءوز كەزەگىندە ەلدىڭ ءال-اۋقاتىن ارتتىرۋعا، تۇرمىس دەڭگەيىن كوتەرۋگە ىقپال ەتەتىندىگى ءسوزسىز. وسىعان وراي قالامىزدىڭ بيزنەس وكىلدەرىن جاڭا جوبالاردى بىرلەسە جۇزەگە اسىرۋعا شاقىرامىن. اكىمدىك تاراپىنان بارلىق قولداۋ شارالارى بولادى، - دەدى م.ايتەنوۆ.
قاڭتارداعى جاپپاي تارتىپسىزدىك ناتيجەسىندە 33 كاسىپكەرلىك سۋبەكتىسى ءتۇرلى دەڭگەيدە زارداپ شەگىپ، 238,8 ملن.تەڭگە شىعىنعا ۇشىراعانىن، 19 بيزنەس نىسانىنىڭ قىزمەتى قالپىنا كەلتىرىلىپ، قالىپتى رەجيمدە جۇمىس ىستەپ جاتقانىن ايتتى. زارداپ شەككەندەردىڭ كاسىپتەرى تولىق قالپىنا كەلتىرىلەتىنىن جەتكىزدى.
شىمكەنتتە كوروناۆيرۋستىق پاندەمياعا «قاراپايىم زاتتار ەكونوميكاسى» باعدارلاماسى ءساتتى جۇزەگە اسىرىلۋدا. باعدارلاما شەڭبەرىندە بۇگىنگى كۇنى 64 ملرد.تەڭگەگە 77 جوبانى قارجىلاندىرۋ ماقۇلدانعان. «بيزنەستىڭ جول كارتاسى» باعدارلاماسىندا سالالىق شەكتەۋلەردىڭ الىنىپ تاستالۋىنا بايلانىستى شاعىن كاسىپ اراسىندا جوعارى سۇرانىسقا يە بولىپ، 2021 جىلى 50,9 ملرد.تەڭگە سوماسىنا 1523 شوب-پەن شارتقا قول قويىلعان. بۇل رەتتە ينۆەستيتسيالىق شتاب جۇمىسىنىڭ تيىمدىلىگىن اتاپ وتۋگە بولادى. اشىق الاڭ بيزنەس ماسەلەلەرىن جەدەل شەشۋگە كومەكتەسىپ، ينۆەستيتسيا تارتۋدىڭ قۇرالىنا اينالدى.
كەزدەسۋدە كاسىپكەرلەر بيزنەستىڭ دامۋىنا كەدەرگى كەلتىرەتىن وزەكتى ماسەلەلەردى ايتىپ، اتقارۋشى بيلىك وكىلدەرىمەن شەشۋ جولدارى ۇسىنىلدى.
شىمكەنت قالاسى اكىمدىگىنىڭ ءباسپاسوز قىزمەتى
