800 ملن تەڭگە: قازاقستاننىڭ ءبىر وڭىرىندە ەكولوگيالىق اپات ورىن الۋى مۇمكىن

2916
Adyrna.kz Telegram

اقتوبەدە قۇنى 800 ميلليون تەڭگەگە باعالانعان جوبانىڭ ارتى داۋعا اينالدى. قالاداعى كارىز سۋى جينالاتىن ەسكى قويماداعى كارىز شوگىندىلەرىن پايداعا اسىرۋ ءۇشىن جاڭا جوبا دايىندالعان. ال نىسان بىلتىر سالىنۋى كەرەك بولعان. بىراق مەملەكەتتىك تەندەردى ۇتىپ العان مەردىگەر كومپانيا جوسپارلانعان جەرگە تازارتۋ قوندىرعىسىن سالۋ مۇمكىن ەمەس ەكەنىن ايتىپ، جوباعا وزگەرتۋلەر ەنگىزۋىن تالاپ ەتتى، دەپ حابارلايدى “ادىرنا” ۇلتتىق پورتالى 31-ارنانىڭ

">"ينفورمبيۋرو" باعدارلاماسىنا سىلتەمە جاساپ. 

مەردىگەر كومپانيا جوبا وزگەرمەسە، ارتى ەكولوگيالىق اپاتقا اكەلۋى مۇمكىن دەپ وتىر. بىراق جوبا بارلىق مەملەكەتتىك ساراپتامادان ءوتتى دەگەن مونوپوليست كومپانيا مىندەتتى بەرىلگەن ۋاقىتتا اياقتامادى دەپ مەردىگەردى سوتقا بەرگەن. 

قالادان شىعاتىن كارىز سۋى جالعىز قويمادا جينالادى. بۇل جەردەن سۋدىڭ جالپى كولەمىنىڭ 90% قايتا تازارىپ شىعارىلۋى كەرەك. الايدا جۇمىس ىستەپ تۇرعانىنا 72 جىل بولعان جۇيەنىڭ توزىعى جەتكەندىكتەن، سۋدىڭ تەك 50%-ىن عانا تازارتۋعا قىسىمى جەتەدى ەكەن. سوندىقتان قالاداعى بارلىق كوپ قاباتتى تۇرعىن ءۇي مەن مەكەمەلەردى ىستىق جانە سۋىق سۋمەن قامتاماسىز ەتىپ وتىرعان جالعىز مونوپوليست كومپانيا كارىز سۋلارى شوگىندىلەرىن پايداعا اسىرۋ جوباسىن دايىنداپ، تەندەر جاريالاعان.

الايدا تەندەردى ۇتقان مەردىگەر جوبانىڭ سمەتالىق قۇجاتتارى دا، تازارتۋ قوندىرعىسى سالىناتىن جەر دە دۇرىس ەمەس دەپ وتىر. 

"جوبادا ولقىلىقتار بولعان سوڭ ءبىز ونى قايتا قاراۋدى سۇرادىق. ونىڭ ۇستىنە كەشەن سالىناتىن جەردىڭ توپىراعىنا گەولوگيالىق ساراپتاما جاسالماعان. تاپسىرىس بەرۋشىمەن تەحنيكالىق جينالىستار دا وتكىزدىك. ولار باسىندا ءبىز ايتقان وزگەرتۋلەرگە رۇقسات بەرگەنىمەن، كەيىن مەملەكەتتىك ساراپتاما قۇپتامادى دەپ جاۋاپ بەردى. سوسىن بىزگە قۇرىلىستى ەسكى جوبامەن جالعاستىرۋىمىز كەرەگىن ايتتى. ول جوبا دۇرىس بولماعاندىقتان، ءبىز وزىمىزگە ۇلكەن جاۋاپكەرشىلىك العىمىز كەلگەن جوق. ويتكەنى مۇنىڭ ارتى ەكولوگيالىق اپاتقا اكەلۋى مۇمكىن", - دەيدى "اقتوبە نەفتە گاز ستروي" جشس ديرەكتورىنىڭ ورىنباسارى نۇربولات ءامىروۆ.

تاپسىرىس بەرگەن كومپانيا مەردىگەر كومپانيا قۇرىلىستى بەس ايدىڭ ىشىندە اياقتاۋعا مىندەتتەلدى دەيدى. بىراق كەيىن تاعى قوسىمشا كەلىسىم شارت جاسالسا دا، ءوز مىندەتتەرىن اتقارمادى دەپ سوتقا بەرگەن. سوزدەرىنشە، بارلىق مەملەكەتتىك ساراپتامالاردان وتكەن جوبادا ەش وقىلىق جوق. 

"بىرنەشە رەت ءبىزدىڭ تاراپىمىزدان، تەحقاداعالاۋ، اۆتورلىق قاداعالاۋ تاراپىنان بەرىلگەن نۇسقاۋلاردى ورىندامادى. سوندىقتان ءبىز مەملەكەتتىك ساتىپ الۋ زاڭىنا سايكەس سوت ورىندارىنا شاعىمدانۋعا ءماجبۇر بولدىق. سوت ناتيجەسىندە وسى مەردىگەر كومپانيا "مەملەكەتتىك ساتىپ الۋلاردىڭ ىقىلاسسىز قاتىسۋشىسى" بولىپ تانىلىپ، سوت شەشىمى شىقتى", - دەپ مالىمدەدى "Aqtobe su-energy group" اق زاڭ ءبولىمى باسشىسىنىڭ ورىنباسارى تالعات ءسۇيىنشالين.

سوت شەشىمىمەن مۇلدەم كەلىسپەيمىز دەگەن مەردىگەرلەر جوبانىڭ قايتا قارالۋىن تالاپ ەتىپ وتىر. ءارى سوتقا اپەللياتسيالىق شاعىم تۇسىرمەك. دەگەنمەن مونوپوليست كومپانيا جوبانىڭ قايتا قارالمايتىنىن، بىراق مەملەكەتتىك كونكۋرستىڭ قايتا وتەتىنىن جەتكىزدى.

“ادىرنا” ۇلتتىق پورتالى

پىكىرلەر