اتىراۋ وبلىسىنداعى تەڭىز كەنىشىندە 2024 جىلدىڭ سوڭىنا دەيىن 40 مىڭعا جۋىق جۇمىسشى قىسقارادى، دەپ حابارلادى “ادىرنا” ۇلتتىق پورتالى.
“ينفورمبيۋرو” جاڭالىقتار قىزمەتىنىڭ اقپاراتىنشا، ساراپشىلار جەرگىلىكتى بيلىك بۇل ماسەلەنى شۇعىل شەشپەسە ۇلكەن الەۋمەتتىك داعدارىس تۋىندايدى دەپ دابىل قاعىپ جاتىر. ال تۇرعىنداردىڭ وزدەرى اكىمدىك وكىلدەرىنىڭ تۇيتكىلدى ماسەلەنى شەشەمىز دەگەنىنە ۇلكەن كۇمانمەن قارايدى.
تەڭىز كەن ورنىنداعى زاۋىت قۇرىلىسىنان 2024 جىلعا دەيىن 40 مىڭعا جۋىق جۇمىسشى قىسقارادى. ونىڭ 45 پايىزى – اتىراۋلىقتار. بۇل اقپاراتتى جەرىلىكتى اتقارۋشى ورگان وتكەن جىلدىڭ سوڭىندا جاريا ەتىپ، جۇمىسسىز قالعانداردى جۇمىسپەن قامتۋعا ارنالعان كەشەندى جوبالارىنىڭ بارىن ايتقان. الايدا اتىراۋلىق قوعام بەلسەندىلەرى بۇل جوبادا ەشقانداي ناقتىلىق جوق ەكەنىن ايتىپ وتىر.
"اكىمدىكتىڭ ايتىپ وتىرعان 2021-2025 جىلعا كەشەندى جوسپارى ىشىندە ناعىز باعدارلامانى ەشكىم كورگەن جوق، بىراق مەن كورگەن باعدارلامانىڭ بۇكىلىن قوسقاننىڭ وزىندە اتىراۋ وبلىسىندا ەڭ شاۋىپ كەتكەندە مىڭ ادامعا عانا جۇمىس تابىلادى", – دەيدى قوعام بەلسەندىسى تاڭات نۇرىموۆ.
بۇل جۇمىسسىزدىق، اقشا جوقتىق الەۋمەتتىك داعدارىسقا اكەلىپ سوقتىرادى. اتىراۋلىقتار وڭىردە قازىردىڭ وزىندە جۇمىسسىز جۇرگەندەر كوپ دەپ دابىل قاعىپ وتىر. ال تەڭىز كەنىشىنەن مىڭداعان ادام قىسقارىپ قالسا، ايماقتا الەۋمەتتىك ماسەلە ءتىپتى ۋشىعادى. بيىلعى ءبىرىنشى توقساننىڭ وزىندە كەن ورنىنان 3 مىڭعا جۋىق ادام قىسقارادى. ونىڭ 1 270-ءى – اتىراۋلىق ازاماتتار. قازىر اتىراۋدا سەگىز مىڭنان استام جۇمىسسىز بار.
"تەڭىزشەۆرويل كومپانياسىنىڭ مالىمەتىنشە، تەڭىز كەن ورنىنان بيىل 15 مىڭنان استام جۇمىسشى قىسقارادى", – دەيدى اتىراۋ وبلىسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ازامات مامبەتوۆ.
“ادىرنا” ۇلتتىق پورتالى
