Atyraý oblysyndaǵy Teńiz kenishinde 2024 jyldyń sońyna deıin 40 myńǵa jýyq jumysshy qysqarady, dep habarlady “Adyrna” ulttyq portaly.
“Informbıýro” jańalyqtar qyzmetiniń aqparatynsha, sarapshylar jergilikti bılik bul máseleni shuǵyl sheshpese úlken áleýmettik daǵdarys týyndaıdy dep dabyl qaǵyp jatyr. Al turǵyndardyń ózderi ákimdik ókilderiniń túıtkildi máseleni sheshemiz degenine úlken kúmánmen qaraıdy.
Teńiz ken ornyndaǵy zaýyt qurylysynan 2024 jylǵa deıin 40 myńǵa jýyq jumysshy qysqarady. Onyń 45 paıyzy – atyraýlyqtar. Bul aqparatty jerilikti atqarýshy organ ótken jyldyń sońynda jarııa etip, jumyssyz qalǵandardy jumyspen qamtýǵa arnalǵan keshendi jobalarynyń baryn aıtqan. Alaıda atyraýlyq qoǵam belsendileri bul jobada eshqandaı naqtylyq joq ekenin aıtyp otyr.
"Ákimdiktiń aıtyp otyrǵan 2021-2025 jylǵa keshendi jospary ishinde naǵyz baǵdarlamany eshkim kórgen joq, biraq men kórgen baǵdarlamanyń búkilin qosqannyń ózinde Atyraý oblysynda eń shaýyp ketkende myń adamǵa ǵana jumys tabylady", – deıdi qoǵam belsendisi Tańat Nurymov.
Bul jumyssyzdyq, aqsha joqtyq áleýmettik daǵdarysqa ákelip soqtyrady. Atyraýlyqtar óńirde qazirdiń ózinde jumyssyz júrgender kóp dep dabyl qaǵyp otyr. Al Teńiz kenishinen myńdaǵan adam qysqaryp qalsa, aımaqta áleýmettik másele tipti ýshyǵady. Bıylǵy birinshi toqsannyń ózinde ken ornynan 3 myńǵa jýyq adam qysqarady. Onyń 1 270-i – atyraýlyq azamattar. Qazir Atyraýda segiz myńnan astam jumyssyz bar.
"Teńizshevroıl kompanııasynyń málimetinshe, Teńiz ken ornynan bıyl 15 myńnan astam jumysshy qysqarady", – deıdi Atyraý oblysy jumyspen qamtý jáne áleýmettik baǵdarlamalar basqarmasynyń basshysy Azamat Mámbetov.
“Adyrna” ulttyq portaly
