اباي اۋدانىنا قاراستى «سامال-3» شاعىن اۋدانىنىڭ 27 مىڭنان استام تۇرعىنى بيىل ورتالىقتاندىرىلعان كارىز جۇيەسىنە قوسىلادى. بۇل تۋرالى قالا اكىمى مۇرات ايتەنوۆ جەرگىلىكتى تۇرعىندارمەن كەزدەسۋ كەزىندە ايتتى.
شاعىن اۋدان تۇرعىندارى اكىممەن بولعان اشىق سۇقباتتا ينتەرنەت، جول ماسەلەسى مەن ايالداما ورناتۋ بويىنشا وتىنىشتەرىن جەتكىزدى.
حالىقتىڭ سۇراعىنا ناقتى جاۋاپ بەرگەن قالا باسشىسى وتكەن جىلى ءۇش كوشە جوندەلسە، وسى جىلى 7 كوشەگە اسفالت توسەلەتىنىن ال، كارىز جۇيەلەرى جۇرگىزىلىپ جاتقان كوشەلەردە قۇرىلىس جۇمىستارى اياقتالعان سوڭ، الداعى جىلدارى اسفالتتاۋ جۇمىستارى اتقارىلاتىنىن اتاپ ءوتتى. سونىمەن بىرگە شاعىن اۋداندى ساپالى ينتەرنەتپەن قامتۋ ءۇشىن جىل سوڭىنا دەيىن تالشىقتى وپتيكا جەلىسىمەن قامتۋ جۇمىستارى جۇرگىزىلەتىنىن ءمالىم ەتتى. ال ايالداما ورناتۋ بويىنشا سالالىق باسقارماعا زەردەلەۋ جۇمىستارىن جۇرگىزۋدى تاپسىردى.
مۇرات ايتەنوۆ وسى جىلى بيۋدجەت ەسەبىنەن 3 سپورت الاڭشا مەن 1 بالالار الاڭشاسى سالىناتىن ايتىپ، بۇل جۇمىستاردىڭ بارلىعى تۇرعىنداردىڭ جايلى ءومىر سۇرۋىنە جاعداي جاساۋ ءۇشىن جاسالىپ كەلەتىنىن ايتىپ ءوتتى.
جالپى شاعىن اۋداندا 6800 وتباسى تۇرادى. ەلدى مەكەن تۇرعىندارى تولىعىمەن اۋىز سۋمەن، تابيعي گازبەن جانە ساپالى ەلەكتر جارىعىمەن قامتىلعان. مۇنداعى كوممۋنالدىق ماسەلە كارىز جۇيەسىمەن قامتۋ، ولدا بيىل شەشىمىن تابادى. وتكەن جىلى 6 كوشە جارىقتاندىرىلسا، بيىل 1 كوشەگە جارىقتاندىرۋ جۇمىستارى جۇرگىزىلەدى. 7 باعىتتا قوعامدىق كولىك قاتىنايدى.
شىمكەنت قالاسى اكىمدىگىنىڭ ءباسپاسوز قىزمەتى
