شىمكەنت قالاسىندا كاسىپكەرلىك نىساندارى ءۇشىن كارانتيندىك شەكتەۋلەر ءبىرشاما جەڭىلدەتىلدى. بۇل تۋرالى اقپاراتتىق-كوممۋنيكاتسيالىق ورتالىقتا وتكەن ءباسپاسوز ءماسليحاتىندا شىمكەنت قالاسى سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى ءابدىماناپ تولەباەۆ مالىمدەدى.
—بۇعان دەيىن Ashyq جوباسىنا قاتىساتىن كاسىپكەرلىك نىساندارى تۇنگى ساعات 0:00-گە دەيىن، ال، «كوشباسشى» مارتەبەسى بار نىساندار تۇنگى ساعات 2:00-گە دەيىن جۇمىس ىستەيتىن ەدى. جاڭا قاۋلىعا سايكەس، جۇمىس ۋاقىتى بويىنشا بارلىق شەكتەۋلەر الىنىپ تاستالدى. Ashyq جوباسىنا قاتىساتىن مەيرامحانا، ءدامحانا، قوعامدىق تاماقتانۋ ورىندارى، بيليارد، بوۋلينگ، كومپيۋتەر كلۋبتارى، تەاتر، كينويەاتر جانە كونتسەرت زالدارى «جاسىل» مەن «كوك» مارتەبەسى كەلۋشىلەردى تولتىرىلۋىن 60 پايىزدان اسىرماي جۇمىس ىستەي الادى، — دەيدى ءا.تولەباەۆ.
ال، ۇجىمدىق قۇدايعا قۇلشىلىق ورىندارى، فيتنەس، يوگا، سپورت كەشەندەرى، كورەرمەندەر قاتىساتىن سپورت جارىستارى، سونداي-اق، سالتاناتتى جيىندار، توي، اس، كونفەرەنتسيا، فورۋمدار مەن سەمينارلار جانە كورمەلەر وتكىزىلەتىن ورىندار جۇمىس ۋاقىتىنا شەكتەۋسىز جۇمىس ىستەي الادى. مۇنداعى باستى تالاپ — قىزمەتكەرلەر مەن كەلۋشىلەردىڭ بارلىعىندا «جاسىل» مارتەبە بولۋى ءتيىس.
ايتا كەتەيىك، ءباسپاسوز ءماسليحاتىنا سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارلارى الدارقۇل احمەتوۆ پەن ايگۇل تۇرىمبەتوۆا جانە «اتامەكەن» كاسىپكەرلەر پالاتاسى ديرەكتورىنىڭ ورىنباسارى سابيرا ادامبەكوۆا دا قاتىسىپ، جۋرناليستەردىڭ سۇراقتارىنا جاۋاپ بەردى.
«شىمكەنت كەلبەتى» — ايدار قۇلجانوۆ،
فوتو سەرىك قوساەۆ
