كونگو دەموكراتيالىق رەسپۋبليكاسىنداعى اسكەري تريبۋنال بۇۇ-نىڭ ەكى قىزمەتكەرىن ولتىرگەن 50-دەن استام ادامدى ءولىم جازاسىنا كەستى، دەپ حابارلايدى "ادىرنا" ۇلتتىق پورتالى.
54 ايىپتالۋشىنىڭ بىرەۋى 10 جىلعا باس بوستاندىعىنان ايىرىلسا، تاعى ەكەۋى اقتالدى. وسىلايشا، 51 ادام ءولىم جازاسىنا كەسىلدى. كونگودا 2003 جىلدان بەرى ءولىم جازاسىنا موراتوري جاريالانعان، سوندىقتان سوتتالعاندار ءومىر بويىنا باس بوستاندىعىنان ايىرىلادى.
بۇۇ-نىڭ ەكى ساراپشىسىن ءولتىرۋ وقيعاسى 2017 جىلدىڭ ناۋرىز ايىندا بولعان. شۆەتسيا ازاماتى زايدا كاتالان مەن اقش ازاماتى مايكل شارپ كونگونىڭ كاساي پروۆينتسياسىندا جوعالىپ كەتتى. ەكى اپتادان كەيىن ولاردىڭ دەنەسى تابىلدى.
ەستەرىڭىزگە سالا كەتەيىك، بۇعان دەيىن كونگو دەموكراتيالىق رەسپۋبليكاسىندا سودىرلاردىڭ اۋىلدارعا جاساعان شابۋىلىنان ونداعان ادامنىڭ قۇربان بولعانى حابارلانعان بولاتىن. ەلدىڭ شىعىسىنداعى يتۋري پروۆينتسياسىنىڭ دجۋگۋ اۋدانىندا قارۋلى ادامدار جۇزدەن استام بەيبىت تۇرعىندى ءولتىردى. ازىرگە بيلىك شابۋىلداردى ۇيىمداستىرعان قىلمىستىق توپ تۋرالى مالىمەتتى جاريالاماي وتىر.
"ادىرنا" ۇلتتىق پورتالى
