رەسەيدىڭ جوو-لارى «بولاشاق» تىزىمىنە قوسىلدى

2670
Adyrna.kz Telegram

رەسەيدىڭ جەتەكشى تەحنيكالىق ۋنيۆەرسيتەتتەرى «بولاشاق» باعدارلاماسى بويىنشا وقىتاتىن شەتەلدىك جوعارى وقۋ ورىندارىنىڭ تىزىمىنە ەندى. وسىلايشا، ءبىلىم جانە عىلىم مينيسترلىگى پرەزيدەنتتىڭ تاپسىرماسىن ورىنداۋ بويىنشا ءتيىستى جۇمىستاردى اتقارىپ جاتىر، دەپ حابارلايدى «ادىرنا» ءتىلشىسى بعم ءباساسوز قىزمەتىنە سىلتەمە جاساپ.

تىزىمگە بارلىعى 27 ەلدەن 200-دەن استام ۋنيۆەرسيتەت ەنگىزىلگەن. ەندى تەحنيكالىق باعىتتاعى مامانداردى دايارلايتىن تىزىمگە رەسەيلىك جوو-لاردان ن.ە.باۋمان اتىنداعى ماسكەۋ مەملەكەتتىك تەحنيكالىق ۋنيۆەرسيتەتى، «Mيفي» ۇلتتىق زەرتتەۋ يادرولىق ۋنيۆەرسيتەتى، م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى، سانكت-پەتەربۋرگ مەملەكەتتىك ۋنيۆەرسيتەتى جانە ماسكەۋ فيزيكا-تەحنيكالىق ينستيتۋتى ەندى.

سونداي-اق مينيسترلىك قازىرگى ۋاقىتتا «ميسيس» ۇلتتىق زەرتتەۋ تەحنيكالىق ۋنيۆەرسيتەتىن جانە يتمو ۇلتتىق زەرتتەۋ ۋنيۆەرسيتەتىن تىزىمگە ەنگىزۋ بويىنشا جۇمىس جۇرگىزىپ جاتىر.

«بولاشاق» الداعى ۋاقىتتا اۋقىمىن باسقا ەلدەرمەن جانە ۋنيۆەرسيتەتتەرمەن كەڭەيتەتىنىن اتاپ وتكەن ءجون.

«جالپى العاندا تىزىمدە الەمنىڭ 30-عا جۋىق مەملەكەتىنىڭ 200-دەن استام ۇزدىك ۋنيۆەرسيتەتى بار. قازاقستاندىقتارعا مەملەكەتپەن قاتار جوعارى وقۋ ورنىن تاڭداۋدىڭ ۇلكەن مۇمكىندىگى ۇسىنىلىپ وتىر. ءبىز تەك وتكەن جىلى عانا تاعى ءتورت مەملەكەتتى قوسىپ، باعدارلاما اۋقىمىن كەڭەيتتىك. ولاردىڭ ىشىندە اۆستريا، چەحيا، يرلانديا مەن وڭتۇستىك افريكا بار. سونداي-اق «بولاشاق» باعدارلاماسى بويىنشا گارۆارد ۋنيۆەرسيتەتىنە، ماسساچۋسەتس تەحنولوگيالىق ينستيتۋتىنا، وكسفورد ۋنيۆەرسيتەتىنە نەمەسە پرينستون ۋنيۆەرسيتەتى جانە تاعى باسقالارىنا وقۋعا ءتۇسۋ مۇمكىندىكتەرى بۇرىنعىداي قالا بەرەدى. الەمنىڭ 200-دەن استام جوو-سى بار ءتىزىم رەسەيدىڭ ۇزدىك جوعارى وقۋ ورىندارىمەن تاعى تولىققانى ءبىزدىڭ تۇلەكتەرگە ۋنيۆەرسيتەت تاڭداۋ مۇمكىندىگىن ودان ءارى ۇلعايتىپ، تەحنيكالىق باعىتتار بويىنشا ءبىلىم الۋدىڭ قولجەتىمدىلىگىن ارتتىرادى. بۇدان بولەك ءبىز تەحنيكالىق باعىتتاعى ماماندىقتارعا باسىمدىق بەرىپ وتىرمىز»، – دەدى ءبىلىم جانە عىلىم ۆيتسە-ءمينيسترى قۋانىش ەرعاليەۆ.

«ادىرنا» ۇلتتىق پورتالى

پىكىرلەر