Reseıdiń jetekshi tehnıkalyq ýnıversıtetteri «Bolashaq» baǵdarlamasy boıynsha oqytatyn sheteldik joǵary oqý oryndarynyń tizimine endi. Osylaısha, Bilim jáne ǵylym mınıstrligi Prezıdenttiń tapsyrmasyn oryndaý boıynsha tıisti jumystardy atqaryp jatyr, dep habarlaıdy «Adyrna» tilshisi BǴM basasóz qyzmetine silteme jasap.
Tizimge barlyǵy 27 elden 200-den astam ýnıversıtet engizilgen. Endi tehnıkalyq baǵyttaǵy mamandardy daıarlaıtyn tizimge reseılik JOO-lardan N.E.Baýman atyndaǵy Máskeý memlekettik tehnıkalyq ýnıversıteti, «MIFI» Ulttyq zertteý ıadrolyq ýnıversıteti, M.V.Lomonosov atyndaǵy Máskeý memlekettik ýnıversıteti, Sankt-Peterbýrg memlekettik ýnıversıteti jáne Máskeý fızıka-tehnıkalyq ınstıtýty endi.
Sondaı-aq mınıstrlik qazirgi ýaqytta «MISıS» Ulttyq zertteý tehnıkalyq ýnıversıtetin jáne ITMO Ulttyq zertteý ýnıversıtetin tizimge engizý boıynsha jumys júrgizip jatyr.
«Bolashaq» aldaǵy ýaqytta aýqymyn basqa eldermen jáne ýnıversıtettermen keńeıtetinin atap ótken jón.
«Jalpy alǵanda tizimde álemniń 30-ǵa jýyq memleketiniń 200-den astam úzdik ýnıversıteti bar. Qazaqstandyqtarǵa memleketpen qatar joǵary oqý ornyn tańdaýdyń úlken múmkindigi usynylyp otyr. Biz tek ótken jyly ǵana taǵy tórt memleketti qosyp, baǵdarlama aýqymyn keńeıttik. Olardyń ishinde Avstrııa, Chehııa, Irlandııa men Ońtústik Afrıka bar. Sondaı-aq «Bolashaq» baǵdarlamasy boıynsha Garvard ýnıversıtetine, Massachýsets tehnologııalyq ınstıtýtyna, Oksford ýnıversıtetine nemese Prınston ýnıversıteti jáne taǵy basqalaryna oqýǵa túsý múmkindikteri burynǵydaı qala beredi. Álemniń 200-den astam JOO-sy bar tizim Reseıdiń úzdik joǵary oqý oryndarymen taǵy tolyqqany bizdiń túlekterge ýnıversıtet tańdaý múmkindigin odan ári ulǵaıtyp, tehnıkalyq baǵyttar boıynsha bilim alýdyń qoljetimdiligin arttyrady. Budan bólek biz tehnıkalyq baǵyttaǵy mamandyqtarǵa basymdyq berip otyrmyz», – dedi Bilim jáne ǵylym vıe-mınıstri Qýanysh Erǵalıev.
«Adyrna» ulttyq portaly
