وتىز جىل بويى ماقتانىپ كەلدىك. «تۇركىمەننەن، وزبەكتەن وزىپ كەتتىك، تمد ەلدەرىنەن اسىپ تۇستىك، شىعىس ەۋروپا مەملەكەتتەرىمەن قاتارلاسىپ قالدىق، وزىق وتىز ەلدىڭ قاتارىنا قوسىلدىق» دەپ رەسمي حابارلاپ تا جىبەردىك. قايدا قوسىلعانىمىز؟! حالقىمىز ءالى قايىرشىنىڭ كۇيىن كەشىپ كەلەدى.
كەشە ميتينگىگە «بۇزاقى»، «وڭباعان» جاستار شىقتى دەدى. بىراق ولار نەگە شىقتى؟ ولار ابدەن اشىنعاننان شىقتى. كەدەيلىكتىڭ شىڭىنا جەتىپ شىقتى. نە جۇمىس جوق، نە الاتىن جالاقىسى از. 50-60 مىڭ تەڭگەگە قالاي كۇن كورەدى؟ الدەقانداي ەتىپ تومەنگى جالاقىنى 42 500 تەڭگەدەن 60 مىڭعا كوتەردىك دەپ جاريا ەتتى. اينالايىندار، 60 مىڭ تەڭگەمەن كىم ءومىر سۇرەدى؟!
وتكەندە ەكى بالاسى بار، كۇيەۋى جوق كوشە سىپىرۋشى ايەل تەلەارنادان سويلەپ جاتىر. قارا نان مەن قارا سۋدى تالعاجاۋ ەتىپ وتىرعانىن ايتتى. 60 مىڭ تەڭگەمەن ەكى بالانى قالاي اسىرايدى؟ ەرتەڭ كۇيىنىپ، ەكى بالاسىن تەرەزەدەن لاقتىرىپ جىبەرمەيتىنىنە كىم كەپىل؟ بۇعان دەيىن ءۇش بالاسىن 9 قاباتتان لاقتىرىپ، ارتىنان ءوزى دە سەكىرگەن ايەلدىڭ ءولىمى بۇكىل قازاققا قان جۇتقىزدى. سول وتباسى 15 مىڭ تەڭگە كرەديت الىپ، قيىندىققا تاپ بولعان. ءوز حالقىمىزعا قالاي جانىمىز اشىمايدى؟
وسىدان ءۇش جىل بۇرىن جوقشىلىقتىڭ سالدارىنان بەس بالا ورتەنىپ كەتتى. وسىنىڭ بارىنە سەبەپ – جوقشىلىق. جوقشىلىق جۇرتتىڭ شىڭىنا جەتتى. باي بايىعان سايىن، كەدەي كەدەيلەنىپ جاتىر. سول سەبەپتەن دە حالىق اشىندى. اشىنعان ادام ەشتەڭەدەن تايىنبايدى. «ءما، ساعان» دەيدى دە، ءۇيىڭدى دە بۇزادى، كولىكتى دە ورتەيدى، دۇكەندى دە تونايدى.
كەڭەس ۇكىمەتى كەزىندە ءۇش بالا تۋعان اناعا پەرزەنتحانا ۇيىنەن شىعاردا ءۇش بولمەلى پاتەردىڭ وردەرىن بەرەتىن. قازىر 3 بالا تۇرماق، 10 بالا تۋسا دا ەشكىمنىڭ شارۋاسى جوق. انا مەن بالاعا نەمقۇرايلى بوپ كەتتىك. انشەيىندە رەسەي ناسىباي يىسكەسە، ءبىز تۇشكىرەمىز. سولاردىڭ بۇكىل رەفورماسىن قايتالايمىز. ۇلتقا كەرەك ەمەس جاعىن الامىز. بىراق ءپۋتيننىڭ انالارعا جاساپ جاتقان جاقسىلىعىن «انا كاپيتالىن» قابىلداعىمىز كەلمەيدى. 60 مىڭ تەڭگەنى الدەقانداي قىلىپ جاتىرمىز. ال ولار جاڭا تۋعان نارەستەگە 250 مىڭ رۋبل جاردەماقى تولەيدى.
وزبەك حالقى سياقتى ۇلتقا جانى اشيتىن باسشى كەلمەدى. ولار دەموگرافياعا سوناۋ جىلدارى-اق كوڭىل ءبولدى. ال ءبىزدىڭ مۇنىمەن شارۋامىز سول كەزدە دە بولعان جوق، تاۋەلسىزدىكتەن كەيىن دە بولعان ەمەس. قايتا بيلىك قازاقتىڭ كوبەيۋىنە قارسى بولدى.
