Otyz jyl boıy maqtanyp keldik. «Túrkimennen, ózbekten ozyp kettik, TMD elderinen asyp tústik, Shyǵys Eýropa memleketterimen qatarlasyp qaldyq, ozyq otyz eldiń qataryna qosyldyq» dep resmı habarlap ta jiberdik. Qaıda qosylǵanymyz?! Halqymyz áli qaıyrshynyń kúıin keship keledi.
Keshe mıtıngige «buzaqy», «ońbaǵan» jastar shyqty dedi. Biraq olar nege shyqty? Olar ábden ashynǵannan shyqty. Kedeıliktiń shyńyna jetip shyqty. Ne jumys joq, ne alatyn jalaqysy az. 50-60 myń teńgege qalaı kún kóredi? Áldeqandaı etip tómengi jalaqyny 42 500 teńgeden 60 myńǵa kóterdik dep jarııa etti. Aınalaıyndar, 60 myń teńgemen kim ómir súredi?!
Ótkende eki balasy bar, kúıeýi joq kóshe sypyrýshy áıel telearnadan sóılep jatyr. Qara nan men qara sýdy talǵajaý etip otyrǵanyn aıtty. 60 myń teńgemen eki balany qalaı asyraıdy? Erteń kúıinip, eki balasyn terezeden laqtyryp jibermeıtinine kim kepil? Buǵan deıin úsh balasyn 9 qabattan laqtyryp, artynan ózi de sekirgen áıeldiń ólimi búkil qazaqqa qan jutqyzdy. Sol otbasy 15 myń teńge kredıt alyp, qıyndyqqa tap bolǵan. Óz halqymyzǵa qalaı janymyz ashymaıdy?
Osydan úsh jyl buryn joqshylyqtyń saldarynan bes bala órtenip ketti. Osynyń bárine sebep – joqshylyq. Joqshylyq jurttyń shyńyna jetti. Baı baıyǵan saıyn, kedeı kedeılenip jatyr. Sol sebepten de halyq ashyndy. Ashynǵan adam eshteńeden taıynbaıdy. «Má, saǵan» deıdi de, úıińdi de buzady, kólikti de órteıdi, dúkendi de tonaıdy.
Keńes úkimeti kezinde úsh bala týǵan anaǵa perzenthana úıinen shyǵarda úsh bólmeli páterdiń orderin beretin. Qazir 3 bala turmaq, 10 bala týsa da eshkimniń sharýasy joq. Ana men balaǵa nemquraıly bop kettik. Ánsheıinde Reseı nasybaı ıiskese, biz túshkiremiz. Solardyń búkil reformasyn qaıtalaımyz. Ultqa kerek emes jaǵyn alamyz. Biraq Pýtınniń analarǵa jasap jatqan jaqsylyǵyn «Ana kapıtalyn» qabyldaǵymyz kelmeıdi. 60 myń teńgeni áldeqandaı qylyp jatyrmyz. Al olar jańa týǵan nárestege 250 myń rýbl járdemaqy tóleıdi.
Ózbek halqy sııaqty ultqa jany ashıtyn basshy kelmedi. Olar demografııaǵa sonaý jyldary-aq kóńil bóldi. Al bizdiń munymen sharýamyz sol kezde de bolǵan joq, táýelsizdikten keıin de bolǵan emes. Qaıta bılik qazaqtyń kóbeıýine qarsy boldy.
