الماتىدا ۇيىمداسقان قىلمىستىق توپتىڭ قارۋلى بەس جەتەكشىسى مەن توپ مۇشەلەرى ۇستالدى، دەپ حابارلايدى "ادىرنا" ۇلتتىق پورتالى.
بۇل تۋرالى لاڭكەستىككە قارسى كۇرەس جونىندەگى جەدەل شتابتان حابارلادى.
«انتيتەررورلىق ءىس-شارالار بارىسىندا 4-6 قاڭتار ارالىعىندا الماتىدا مەملەكەتتىك مەكەمەلەر مەن كوممەرتسيالىق نىساندارعا قاراقشىلىق شابۋىل جاساۋعا قاتىسقان ۇيىمداسقان قىلمىستىق توپتىڭ بەس جەتەكشىسى مەن توپ مۇشەلەرى ۇستالدى»، - دەلىنگەن حابارلامادا.
كۇدىكتىلەردەن «پم»، «تت» تاپانشالارى، كەسىلگەن شولاق مىلتىق، ولارعا ارنالعان گيلزالار، ۇنتاق ءتارىزدى زات جانە ەرەكشە ءيىسى بار تابلەتكالار الىندى.
بولعان جاعدايعا بايلانىستى، الماتىنىڭ تۇركسىب اۋدانىندا 26 قاڭتار كۇنى ساعات 00.00-دەن 27 قاڭتار كۇنى ساعات 00.00-گە دەيىن انتيتەررورلىق وپەراتسيا رەجيمى ەنگىزىلدى.
«ارنايى جانە قۇقىق قورعاۋ ورگاندارى تارتىپسىزدىكتەرگە قاتىسۋشىلار مەن ۇيىمداستىرۋشىلاردى انىقتاۋ بويىنشا جەدەل-ىزدەستىرۋ شارالارىن جالعاستىرۋدا.
قۇقىق قورعاۋ ورگاندارىنىڭ جۇمىسىنا تۇسىنىستىكپەن قاراۋىڭىزدى، ولاردىڭ زاڭدى تالاپتارىن قاتاڭ ساقتاۋىڭىزدى سۇرايمىز»، - دەدى الماتى قالالىق تەرروريزمگە قارسى كۇرەس جونىندەگى جەدەل شتاب.
"ادىرنا" ۇلتتىق پورتالى
