مەملەكەت باسشىسى قاسىم-جومارت توقاەۆتىڭ قر پارلامەنتى ءماجىلىسىنىڭ وتىرىسىندا سويلەگەن سوزىندە تەحنيكالىق ماماندىقتارعا باسىمدىق بەرۋ كەرەك دەگەن تاپسىرماسىنا وراي باق وكىلدەرى ءباسپاسوز تۋرى بارىسىندا قالاداعى پوليتەحنيكالىق كوللەدج بەن №6 ارناۋلى وقۋ ورنىنىڭ جۇمىسىمەن تانىستى.
پوليتەحنيكالىق كوللەدج «جاس مامان» جوباسىنا ىرىكتەلگەن شاھارداعى ارناۋلى وقۋ ورىندارىنىڭ بىرىنە كىرەدى. مۇندا تەحنيكالىق ماماندىقتار، سونىڭ ىشىندە «جاس مامان» جوباسى اياسىندا راديوتەحنيكا جانە بايلانىس، سونداي-اق ەلەكترمەن قامتاماسىز ەتۋ ماماندىقتارى تەرەڭدەتىلىپ وقىتىلادى.
راديوتەحنيكادان ءدارىس بەرەتىن ۇستاز ەسىمحان دوسجانوۆ پەن شاكىرتى دانيال ماقساتۇلى ماماندىقتى وقىتۋدا قولدانىلاتىن زەرتحانالىق، تاجىريبەلىك قۇرال-جابدىقتارمەن تانىستىرىپ شىقتى. وعان زەرتحانالىق مودۋل، اكسيلوگراف، اكتيۆتى يدەنتيفيكاتور، وپتيكالىق رەفلەكتومەتر، Fitel S 179 اپپاراتى، وپتيكالىق مۋفتا سەكىلدى قۇرال-جابدىقتار جاتادى.
ەلەكترمەن قامتاماسىز ەتۋ ماماندىعىندا ەلەكتر جەلىسىن مونتاجداۋ، ۇيگە دوموفون ورناتۋ سەكىلدى جۇمىستاردى تاجىريبە جۇزىندە ۇيرەتەدى.
جوعارىدا اتالعان قۇرال-جابدىقتاردى «جاس مامان» جوباسى اياسىندا ساتىپ الۋعا مەملەكەت ەسەبىنەن 288 ملن. تەڭگە بولىنگەنى تۋرالى پوليتەحنيكالىق كوللەدج ديرەكتورىنىڭ ورىنباسارى الىبەك بەكوۆ ايتىپ ءوتتى. كوللەدج زەرتحانالىق ستەندتەر ارقىلى راديوبايلانىس پەن ەلەكتر ەنەرگياسى ماماندىقتارىن تەرەڭدەتىپ وقىتۋعا ايرىقشا ءمان بەرەدى.
قالاداعى №6 كوللەدجدە اسپاز، كونديتەر، ناۋبايشى، ازىق-تۇلىك ونىمدەرىن ساتۋشى ماماندىقتارى وقىتىلادى. كوللەدج شاكىرتتەرى شاھارداعى «راحات» فابريكاسى، «مادلەن»، «لادۋشكي»، «ماگنۋم»، «كاۋسار» ءوندىرىس ورىندارى مەن ساۋدا جانە تاماقتانۋ جەلىلەرىندە جۇمىس ىستەۋدە. سونداي-اق اتالعان وقۋ ورنىندا رەستوراندىق سەرۆيس قىزمەتىنە دە ۇيرەتەدى. وقۋ بىتىرگەن تۇلەكتەردىڭ كوپشىلىگى تۇراقتى جۇمىسقا ورنالاسادى.
شىمكەنت قالالىق ءبىلىم باسقارماسىنىڭ باسشىسى جانات تاجيەۆانىڭ ايتۋىنشا، مەگاپوليستە 32 كوللەدجدىڭ 24-ءى تەحنيكالىق باعىتتا ءبىلىم بەرەدى. مەملەكەتتىك تاپسىرىس اياسىندا 5702 ستۋدەنت تەگىن ءبىلىم الادى.
— باسقارما تاراپىنان قالاداعى ءىرى قۇرىلىس كاسىپورىندارمەن كەلىسسوزدەر جۇرگىزۋدىڭ ارقاسىندا 1604 ماماندىققا سۇرانىس بار ەكەنى انىقتالدى. سوندىقتان وسى ماماندىقتارعا دايارلاۋ ءۇشىن تەحنيكالىق كوللەدجدەرگە قىسقا مەرزىمدى وقۋ كۋرستارىن ۇيىمداستىردىق. ول تاس قالاۋشى، قۇرىلىسشى، سىلاقشى سەكىلدى ماماندىقتار. بۇرىن وقۋ بىتىرگەن تۇلەكتەردىڭ جۇمىسقا ورنالاسقانىن زەينەتاقى قورى ارقىلى ءبىلىپ وتىراتىنبىز. قازىر انىقتاۋ ءتاسىلىن وزگەرتتىك. سونىڭ ءبىر دالەلى، 27 كاسىپورىنمەن تىكەلەي كەلىسىمشارتقا وتىردىق. سونداي-اق الداعى ءىس-شارالار جوسپارى بويىنشا زاڭگەر، ەكونوميست سەكىلدى ماماندىقتار قىسقاراتىن بولادى، - دەدى جانات ارىسبەكقىزى.
ءانۋار جۇماشباەۆ
فوتو سەرىك قوساەۆ
