بۇگىن ۇكىمەت وتىرىسىندا ەلىمىزدىڭ باتىسىنداعى 4 وبلىستى دامىتۋدىڭ كەشەندى جوسپارى قابىلداندى، دەپ حابارلايدى “ادىرنا” ۇلتتىق پورتالى قازاقپاراتقا سىلتەمە جاساپ.
«باتىس وڭىرلەردىڭ ەرەكشەلىكتەرى مەن ولاردىڭ ەل ەكونوميكاسىنىڭ دامۋىنا قوسىپ وتىرعان ۇلەسىن ەسكەرەتىن بولساق، اتالعان وبلىستاردى الەۋمەتتىك-ەكونوميكالىق جاعىنان ءارى قاراي دامىتۋ جانە تۇرعىنداردىڭ ءال-اۋقاتىن جاقسارتۋ وتە وزەكتى ماسەلە بولىپ تابىلادى. ماڭعىستاۋ جانە اتىراۋ وبلىستارى بويىنشا كەشەندى جوسپارلار وتكەن جىلى قابىلدانعان بولاتىن. ولاردى تاعى دا ءبىر پىسىقتاپ، قوسىمشا قارجىلاندىرۋ قاجەت بولدى. ال اقتوبە جانە باتىس قازاقستان وبلىستارىنا كەلەتىن بولساق، ءوڭىر جوسپارلارى بۇگىن ءبىرىنشى رەت بەكىتۋگە ۇسىنىلىپ وتىر»،- دەدى قر پرەمەر-ءمينيسترى ءاليحان سمايىلوۆ.
ونىڭ اتاپ وتۋىنشە، كەشەندى جوسپارلار ەكونوميكانىڭ جەكەلەگەن سالالارىن دامىتۋعا عانا ەمەس، سونداي-اق ساپالى سۋمەن قامتاماسىز ەتۋ، ءبىلىم بەرۋ مەن دەنساۋلىق ساقتاۋدىڭ قولجەتىمدى بولۋى، جاڭا جۇمىس ورىندارىن قۇرۋ سياقتى ماڭىزدى ماسەلەلەردى شەشۋگە باعىتتالۋى ءتيىس.
«ماسەلەن، اقتوبە وبلىسىندا ونەركاسىپ كولەمىن 2025-ءشى جىلعا قاراي 2,8 ترلن تەڭگەگە دەيىن ارتتىرۋ جانە قوسىمشا 39 مىڭنان استام جۇمىس ورنىن قۇرۋ جوسپارلانىپ وتىر. باتىس قازاقستان وبلىسى بويىنشا 2 مىڭ شاقىرىمنان استام ەلەكتر جەلىلەرى جاڭعىرتىلادى، بۇل جەلىلەردىڭ توزۋىن ايتارلىقتاي ازايتاتىن بولادى. 38 مىڭنان استام جاڭا جۇمىس ورنى قۇرىلادى. شامامەن 2,1 ترلن تەڭگە جەكە ينۆەستيتسيا تارتۋ جوسپارلانىپ وتىر. اتىراۋ وبلىسى بويىنشا ەلەكتر جەلىلەرىندە جيىلەپ كەتكەن اپاتتاردى ودان ءارى بولدىرماۋ ءۇشىن ءتيىستى شارالار قابىلدانادى. 40 مىڭنان استام جاڭا جۇمىس ورنى قۇرىلادى. شامامەن 8,3 ترلن تەڭگە جەكە ينۆەستيتسيا تارتۋ جوسپارلانىپ وتىر»،- دەدى ول.
ۇكىمەت باسشىسىنىڭ ايتۋىنشا، ماڭعىستاۋ وبلىسىندا سۋ تاپشىلىعىن ەسكەرە وتىرىپ، سۋ تۇششىتاتىن 9 زاۋىت پەن قوندىرعىنى سالۋ جانە كەڭەيتۋ كوزدەلىپ وتىر. سونداي-اق 55 مىڭنان استام جۇمىس ورنىن قۇرۋ جوسپارلانۋدا.
«قۇجاتتاردا نەگىزىنەن بيۋدجەتتەن تىس قاراجاتتى تارتۋعا باسىمدىق بەرىلىپ وتىر جانە بۇل وتە قۇپتارلىق جايت ەكەنىن اتاپ وتكىم كەلەدى. ەڭ باستىسى ءوڭىر حالقى وڭ وزگەرىستەردى بارىنشا سەزىنۋلەرى كەرەك. بولاشاققا سەنىممەن قاراپ، جۇمىس ىستەپ، تابىس تاۋىپ، وزدەرىنىڭ بيزنەستەرىن دامىتىپ، جاقسى ەمدەلىپ، ساپالى ءبىلىم الۋى ءتيىس. حالىقتىڭ تۇرمىس ساپاسىن ايتارلىقتاي جاقسارتۋ ءۇشىن بارلىق مۇمكىندىكتەردى پايدالانۋ قاجەت. قۇجاتتاردى جالپى ماقۇلدايمىز. ۇلتتىق ەكونوميكا مينيسترلىگىنە، اكىمدىكتەرگە، مۇددەلى مەملەكەتتىك ورگاندار مەن ۇيىمدارعا كەشەندى جوسپارلارداعى ءىس-شارالاردى ۋاقىتىندا جانە ساپالى ىسكە اسىرۋدى قامتاماسىز ەتۋدى تاپسىرامىن»، - دەدى ءاليحان سمايىلوۆ.
“ادىرنا” ۇلتتىق پورتالى
