ءوتىنىش اۆتورلارىنىڭ مالىمدەۋىنشە، تەرگەۋ ورگاندارى، پروكۋراتۋرا جانە سۋديالار ءبىرتانوۆتىڭ كىناسىزدىگى تۋرالى ۋاجىنە نازار اۋدارماي جاتقانىن اتاپ ءوتتى.
- ءبىز ءبىرتانوۆتىڭ تىكەلەي باعىنىشتىسى دا، تۋىسى دا ەمەسپىز جانە ەلجان امانتايۇلىن قىزمەتى ارقىلى عانا تانيمىز. ول ءوزى مەديتسينالىق ۇيىمداردى ارالاپ، تەلەديداردان سۇحبات بەرىپ، دوڭگەلەك ۇستەلدەرگە، بريفينگتەرگە قاتىسىپ، كوتەرىلگەن بىردە-ءبىر ماسەلەنى نازاردان تىس قالدىرعان ەمەس. بۇكىل الەم سياقتى ەلدىڭ ىندەتكە دايىن بولماعانى جانە سول كەزدەگى دەنساۋلىق ساقتاۋ مينيسترىنە تىكەلەي بايلانىستى بولعاننىڭ بارلىعىن ءوزى جاساپ، جۇزەگە اسىرعانى ونىڭ كىناسى ەمەس جانە سول كەزدەگى دەنساۋلىق ساقتاۋ ءمينيسترى وزىنە تىكەلەي قاتىسى بار جۇمىستى دۇرىس اتقارىپ، قولدان كەلگەندى جاسادى، - دەپ جازىلعان پەتيتسيادا.
مەملەكەت باسشىسىنا جولدانعان ۇندەۋدە قازاقستاندىقتار ەلجان ءبىرتانوۆتىڭ ءىسىن ءجىتى قاداعالاپ وتىرعانىن جانە ەكس-ءمينيستردىڭ كىنالى ەكەنىنە سەنبەيتىنى ايتىلعان.
- جاقسى باسشىنىڭ، دارىگەردىڭ، تۇلعانىڭ تاعدىرىنا بەيجاي قارامايتىنىڭىزعا سەنەمىز. ءدال قازىرگى ۋاقىتتا ءسىزدىڭ ۇجىمىڭىزدا قاراپايىم حالىق سەنىم ارتقان وسىنداي كاسىبي ماماندار، پاتريوتتار، بىلىكتى ادامدار بولۋى كەرەك. ءبىرتانوۆتى زاڭسىز قىلمىستىق قۋدالاۋدى توقتاتۋىڭىزدى سۇرايمىز! - دەلىنگەن پەتيتسيادا.
پەتيتسياعا قول قويۋ 21 قاڭتاردا باستالدى. قازىرگى ۋاقىتتا وعان 2 مىڭعا جۋىق ادام قول قويعان.
ەستەرىڭىزگە سالا كەتەيىك، بۇرىنعى دەنساۋلىق ساقتاۋ ءمينيسترى ەلجان ءبىرتانوۆ حورۆاتيالىق Ericsson Nicola Tesla كومپانياسى جاساعان دەنساۋلىق ساقتاۋ مينيسترلىگىن اقپاراتتاندىرۋ پلاتفورماسىن قابىلداپ، ىسكە قوسۋ ارقىلى قىزمەت بابىن اسىرا پايدالاندى دەگەن كۇدىككە ءىلىندى. ءبىرتانوۆتىڭ ۇيقاماقتا وتىرعانىنا ءبىر جىلدان استى. قىلمىستىق ءىس 133 تومنان تۇرادى.
"ادىرنا" ۇلتتىق پورتالى
