جۋرناليست مۇرات مۇقاش فەيسبۋك جەلىسىندە جاقىن ءىنىسىن نارازىلىق كەزىندە پوليتسيا ۇستاپ اكەتكەنىن، كەيىن ونى اتا-اناسى ءمايىتحانادان تاپقانىن ايتىپ جازبا قالدىردى دەپ حابارلايدى "ادىرنا" ۇلتتىق پورتالى.
بۇل تۋرالى مۇرات مۇقاش بىلاي دەپ جازدى (قاز-قالپىندا بەرىپ وتىرمىز-رەد.):
"وتكەن اپتانىڭ جۇماسى ءبىزدىڭ اۋلەتىمىز ءۇشىن اسا اۋىر، قارالى كۇن بولدى! "الماس قايتىس بولدى" دەگەن سۋىق حاباردى ەستىگەندە توبەمىزدەن جاي تۇسكەندەي سەزىندىك! امال قانشا، بارشا تۋىستار تالدىقورعان قالاسىنا جيىلىپ، كوزىمىزدەن جاسىمىز سورعالاپ ءجۇرىپ باۋىرىمىزدى جەر قوينىنا تاپسىردىق! ارتىندا اڭىراپ اناسى، ەڭسەسى ەزىلىپ اكەسى، جۇرەگى قان جىلاعان اعاسى مەن ادال جارى، ءۇش بالاسى قالدى! نەبارى 44 جاستا بولاتىن.
الماس مەنىڭ اكەمنىڭ ۇلكەن اعاسى قاناپيا اتامىزدىڭ نەمەرەسى ەدى. "اعا" دەپ اڭقىلداپ جۇرەتىن كىشىپەيىل ءىنىمنىڭ قازاسى ماعان وتە اۋىر ءتيدى! سول كۇننەن بەرى "نەگە؟" "نە ءۇشىن؟" دەگەن سۇراقتار جاتسام-تۇرسام ويىمنان كەتەر ەمەس.
اتا-اناسىنىڭ ايتۋىنشا، شەرۋگە شىقپاگان. تەك كوكونىس ساتاتىن دۇكەنىن تەكسەرىپ قايتىپ كەلە جاتقان جولدا كەلىن ەكەۋىن پوليتسەيلەر توقتاتادى. كەلىندى سول جەرگە قالدىرادى دا، الماستى الىپ كەتەدى. سودان باستاپ ول جوق بولادى. اتا-اناسى 5 كۇن بويى ىزدەيدى، اقىرى ءمايىتحانادان تابادى.
ءوزىنىڭ شاعىن كاسىبىمەن اينالىسىپ، بالا-شاعاسىن اسىراپ جۇرگەن ءىنىمىزدىڭ ەشقانداي جازىعى جوق ەدى عوي. سونى بىلە تۇرا قۇقىق قورعاۋشى جەندەتتەردىڭ سونشالىقتى ايۋاندىق تانىتىپ، سوققىعا جىققانىن نەمەن تۇسىندىرۋگە بولادى؟ ولارعا بۇيرىق بەرگەن كىم؟..
كەشە الماستىڭ اناسى ءاليا جەڭگەممەن حابارلاستىم. حال-احۋالدارىن سۇرادىم. "قايتەمىز ەندى، ءتىرى ادام تىرشىلىگىن ىستەيدى عوي. پروكۋرورعا باردىم. كىنالى ادامداردى انىقتاپ، جاۋاپكەرشىلىككە تارتۋدى ءوتىنىپ، ارىز جازدىم" - دەدى جەڭگەم. ء"يا، ارتىنان ىزدەۋشىسى جوق ەكەن دەمەسىن. سولاي ىستەگەندەرىڭ دۇرىس قوي", - دەدىم مەن دە جەڭگەمدى قوستاپ، سول كىنالىلەردىڭ مۇلدە تابىلمايتىنىن ىشتەي سەزىپ تۇرسام دا.
ادام قۇقى، ادىلدىك، شىندىك، ادامگەرشىلىك ءتارىزدى كيەلى ۇعىمداردى تۇبەگەيلى جوققا شىعارعان بۇل قوعامعا وسىدان سوڭ قايتىپ ءىشىڭ جىليدى؟! جازىقسىز ءىنىمىزدى ەشقانداي تەرگەپ-تەكسەرۋسىز ازاپتاپ ولتىرگەن ايۋانداردى قارعىس اتسىن!", — دەپ جازدى ول جەلىدە.
ايتا كەتۋ كەرەك، ءدال وسىنداي جاعدايدا پوليتسيانىڭ اكەتۋىمەن كەتكەن نەمەسە جوعالعان بىرقاتار جىگىتتەر ۇيلەرىنە قايتا ورالماي جاتىر. ال ولاردىڭ وتباسى قان جىلاپ، بۇگىندە ءمان-جايدى، شىندىقتى بىلە الماي دال.
"ادىرنا" ۇلتتىق پورتالى.
