بۇگىن قاسىم-جومارت توقاەۆ ەلىمىزدەگى ءبىلىم بەرۋ سالاسىنىڭ قايتا قارالاتىنىن مالىمدەدى.
«ءبىز جاس ازاماتتاردى وقۋعا، ونىڭ ىشىندە رەسەيگە اتتاندىراتىن بولامىز. بالكىم، ەڭ ءبىرىنشى كەزەكتە رەسەيگە، تەحنيكالىق جوعارى وقۋ ورىندارىنا جىبەرۋ كەرەك شىعار»،– دەدى پرەزيدەنت.
وسىعان وراي «ادىرنا» ءتىلشىسى سوڭعى جىلدارى QS حالىقارالىق ۋنيۆەرسيتەتتەر رەيتينگىندە كوش باستاپ كەلگەن تەحنيكالىق ۋنيۆەرسيتەتتەرگە شولۋ جاسادى.
ماسساچۋسەتس تەحنولوگيالىق ينستيتۋتى
QS رەيتينگى بويىنشا ماسساچۋسەتس تەحنولوگيالىق ينستيتۋتى 10 جىل قاتارىنان الەمنىڭ ۇزدىك ۋنيۆەرسيتەتتەرىنىڭ تىزىمىندە ءبىرىنشى ورىندا تۇر. ءدال وسى امەريكالىق ۋنيۆەرسيتەتتىڭ تۇلەكتەرى مەن وقىتۋشىلارىنىڭ اراسىندا 97 نوبەل سىيلىعىنىڭ لاۋرەاتى بار. سونىمەن قاتار، بۇل وقۋ ورنى عىلىمي-زەرتتەۋ، جاڭالىقتار مەن يننوۆاتسيالارداعى الەمدىك كوشباسشىلاردىڭ ءبىرى.
ستەنفورد ۋنيۆەرسيتەتى
تەحنيكالىق ماماندىقتار بويىنشا ءبىلىم بەرەتىن تانىمال تاعى ءبىر امەريكالىق ءبىلىم بەرۋ ورنى – ستەنفورد ۋنيۆەرسيتەتى. ول سان-فرانتسيسكودا ورنالاسقان. اتالعان جوو-نى بىتىرگەن تۇلەكتەر Yahoo!، Google, Electronic Arts سەكىلدى الىپ كومپانيالاردىڭ نەگىزىن قالاۋشىلار بولىپ ەسەپتەلەدى.
كاليفورنيا تەحنولوگيالىق ينستيتۋتى
كاليفورنيا تەحنولوگيالىق ينستيتۋتى – ناقتى عىلىمدار مەن ينجەنەرياعا مامانداندىرىلعان ءبىلىم ورداسى. ول NASA-مەن تىعىز جۇمىس ىستەيدى، سوندىقتان ينستيتۋتتىڭ باسىم باعىتتارىنىڭ ءبىرى – كوسمولوگيا سالاسىنداعى زەرتتەۋلەر.
گارۆارد ۋنيۆەرسيتەتى
گارۆارد ۋنيۆەرسيتەتى – ايۆي ليگاسىنا كىرەتىن زەرتتەۋشى جوعارى وقۋ ورنى. ونىڭ تۇلەكتەرى مەن وقىتۋشىلارى اراسىندا 161 نوبەل سىيلىعىنىڭ لاۋرەاتى بار. 2021 جىلعى Times Higher Education رەيتينگىندە ءبىرىنشى ورىننان كورىندى.
كەمبريدج ۋنيۆەرسيتەتى
كەمبريدج – ەۋروپاداعى ءىرى عىلىمي ورتالىق، ەجەلگى جوو-لاردىڭ ءبىرى. ءدال وسى ۋنيۆەرسيتەتتىڭ قابىرعاسىندا ءدارۆيننىڭ ەۆوليۋتسيا تەورياسى، كريك پەن ۋوتسوننىڭ دنق مودەلى، نيۋتون زاڭدارى جانە باسقا دا كوپتەگەن رەۆوليۋتسيالىق اشۋ جاسالدى. اتالعان وقۋ ورنىنان 15 اعىلشىن پرەمەر-ءمينيسترى، الەم ەلدەرىنىڭ 23 كوشباسشىسى، ءۇندىستاننىڭ 3 پرەمەر-ءمينيسترى، دانيا پاتشايىمى II مارگرەتا وقىپ شىققان.
لوندون يمپەريالىق كوللەدجى
وقۋ ورداسى عىلىم، ينجەنەرلىك، مەديتسينا جانە بيزنەس سالالارىنا ەرەكشە كوڭىل بولەدى. London Imperial College قاۋىمداستىعىنىڭ مۇشەلەرى اراسىندا نوبەل سىيلىعىنىڭ 14 لاۋرەاتى بار.
وكسفورد ۋنيۆەرسيتەتى
وكسفورد ۋنيۆەرسيتەتى دۇنيەجۇزىندەگى ەڭ كونە ۋنيۆەرسيتەتتەرىنىڭ اراسىنان ەكىنشى ورىندى الادى. بۇگىنگى تاڭدا نوبەل سىيلىعىنىڭ 72 لاۋرەاتىنىڭ ەسىمى وسى ءبىلىم ورداسىمەن بايلانىستى، ال ونىڭ عىلىمي جانە ستۋدەنتتىك قوعامداستىعىنىڭ مۇشەلەرى الەمنىڭ باسقا ۋنيۆەرسيتەتتەرىنە قاراعاندا كوبىرەك عىلىمي پاتەنت الادى.
كورىپ وتىرعانىمىزداي، ەڭ ۇزدىك تەحنيكالىق ۋنيۆەرسيتەتتەردىڭ باسىم كوپشىلىگى ۇلىبريتانيا مەن اقش-تا ورنالاسقان. توپ-30-دىققا يتاليا، كانادا، جاپونيا، گەرمانيا، قىتاي جوو-لارى كىرەدى. ال رەسەيلىك ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتى 67-ورىنعا تابان تىرەگەن.
«ادىرنا» ۇلتتىق پورتالى
