الماتىداعى جاپپاي تارتىپسىزدىك كەزىندە قولىنا ەلىمىزدىڭ كوك تۋىن ۇستاپ شىققان جىگىتتىڭ كىم ەكەنى بەلگىلى بولدى، دەپ حابارلايدى "ادىرنا" ۇلتتىق پورتالى.
بۇل جىگىت — قوعام بەلسەندىسى بەرىك ابىشەۆ. ول نارازىلىق كەزىندە باسىنا وق ءتيىپ، جانساقتاۋ بولىمىنە تۇسكەن. قازىر بەلسەندى جىگىتتىڭ جاعدايى جامان ەمەس، ەسىن جيىپتى.
ول تۋرالى فەيسبۋك جەلىسىندە جانىبەك ءيمانمازىر ەسىمدى بەلسەندى جازدى:
"تابىلدى. الەۋمەتتىك جەلىدە تۋ ۇستاپ تانىلعان جىگىت جاڭارىقتا كوزىن اشتى. باسىنا سنايپەردىڭ وعى تيگەن ەكەن. جۇرت سول جىگىتتى كىم دەپ ىزدەپ تاپپاي اماندىق تىلەپ ەدى، ەس ءتۇسسىز جاتقان بەرىك كوپ بولماي كوزىن اشتى. بۇل جىگىت الماتىلىق بەلسەندى بەرىك ابىشەۆ...".
ال جۋرناليست ەرجان ءابدىراماننىڭ ايتۋىنشا، بەرىك ابىشەۆ قازىر الماتىدا اۋرۋحانادا جاتىر. ونى باۋىرلارى بىرنەشە كۇن ىزدەپ، 8 قاڭتار كۇنى 12-اۋرۋحانادا وپەراتسيادان كەيىن ەس-ءتۇسسىز جاتقان جەرىنەن تاۋىپتى. سودان بەرى اعاسى ەرىك ابىشەۆ ونىڭ جانىندا ەكەن.
"ەسىن جيعان سوڭ پوليتسيا الىپ كەتە مە دەپ قورقادى جانە جۇرتشىلىقتان قولداۋ كۇتەدى. سۋرەتتە تۋ ۇستاپ جۇرگەن بەرىك ەكەنىنە سول كەزدە جانىندا بولعان ادامدار كۋا دەيدى ول. ارى قاراي ەرىكتىڭ تەلەفون ارقىلى ايتقان اڭگىمەسى.
"مەنى، اپكەمدى تانىپ وتىر. بىراق كەشە دوسى كەلىپ ەدى، ونى تانىمادى. ەشتەڭە ەسىندە جوق. قۇلاعى دۇرىس ەستىمەي قالعان. سۇيەمەلدەۋمەن اقىرىن جۇرەدى، تاماق ىشەدى. دارىگەرلەر بەرىككە وق ەمەس، جارىقشاق تيگەن، شۇيدەسىنىڭ ءبىر جاعىنان كىرىپ، ساماي تۇسىنا تۇرىپ قالعان دەيدى. بەرىكپەن 6 قاڭتار كۇنى سوڭعى رەت ساعات كەشكى التى جارىم شاماسىندا سويلەسكەم. الاڭدامىن، بەيبىت ميتينگ بولىپ جاتىر دەدى. قايتساڭشى دەپ ەدىم، كەشە ءبىراز ادامدى اتىپ تاستادى، قالاي كەتەم، ودان دا ءوزىڭ كەل دەدى. مەن ول كەزدە جۇمىستا وتىرعام. ءبىراز ۋاقىتتان كەيىن نەشە رەت زۆانداپ الا المادىم. اقىرى ساعات تۇنگى ونداردا ونىڭ تەلەفونىنان باسقا بىرەۋ جاۋاپ بەردى. "بەرىك قايدا؟" دەسەم، "بەرىكتى اتىپ تاستادىم! پلوششادقا كەل، سەنى دە اتىپ تاستايمىن!" دەيدى. ءسويتتى دە تەلەفوندى ءوشىرىپ تاستادى. بۇل كىم، نە ايتىپ تۇر، قالجىڭداپ تۇر ما، الدە پوليتسياعا ءتۇسىپ قالدى ما دەپ ۋايىمدادىق. جابىلىپ ىزدەپ، دارىگەرلەر ءتۇسىرىپ تاراتقان سۋرەتتىڭ كومەگىمەن وسى اۋرۋحانادان تاپتىق. كەلسەم، بەرىك كومادا جاتىر، باسىنان جارالانعان، وپەراتسيا جاسالىپ جاراسى تىگىلگەن، بىراق دارىگەرلەر وپەراتسيا جاساعان جوقپىز، وق العان جوقپىز دەدى. وسىنى تۇسىنبەي وتىرمىن. بىرەۋلەر كنب قىسىپ تاستاعان دەيدى. ايتەۋىر، قازىرگە دەيىن پوليتسيا كەلگەن جوق. بىراق ميتينگىدە جاراقات العانداردى اۋرۋحانادان الىپ كەتىپ جاتقانىن ەستىپ، قورقىپ وتىرمىز" — دەپ جازدى ول فەيسبۋك جەلىسىندە.
سونداي-اق ول: "بەرىك ءوزى تۇنىمەن باسىم دەپ ۇيىقتامايدى. وياۋ كەزىندە تۇسىنىكسىز بىردەڭەلەر ايتادى. جاناشىر ادامدار ءبىزدى ۇمىت قالدىرماۋىن، بەرىكتى الىپ كەتۋىنە جول بەرمەۋىن سۇرايمىز", — دەيدى.
ەلدە بولعان تارتىپسىزدىكتەر كەزىندە باسىن قاتەرگە تىگىپ، قازاقستاننىڭ كوك بايراعىن قولىنا ۇستاپ شىققان پاتريوت بەرىك ابىشەۆكە ءبىز دە اماندىق تىلەيمىز.
"ادىرنا" ۇلتتىق پورتالى.
