ۇكىمەت «وكم وپەراتورىنىڭ»وكىلەتتىگىن توقتاتۋ تۋرالى قاۋلى قابىلدادى. ەندىگى كەزەكتە ۋتيليزاتسيالىق الىمدى «جاسىل دامۋ» مەملەكەتتىك كومپانياسى جۇزەگە اسىرادى. ۇيىم نە ىستەيدى، ونىڭ قارجىلىق جاعدايى قانداي جانە ونى كىم باسقارادى؟ وسى جانە وزگە دە سۇراقتارعا Azattyq Rýhy ءتىلشىسى جاۋاپ بەردى.
اشىق كوزدەردەن الىنعان دەرەكتەر بويىنشا، "جاسىل دامۋ" اكتسيونەرلىك قوعامى قارجى مينيسترلىگىنىڭ مەملەكەتتىك مۇلىك جانە جەكەشەلەندىرۋ كوميتەتىنە تيەسىلى ەكەنى بەلگىلى. كومپانيا سايتىندا اق قازاق ەكولوگيا جانە كليمات عىلىمي-زەرتتەۋ ينستيتۋتىن قايتا قۇرۋ جولىمەن قۇرىلعاندىعى كورسەتىلگەن.
كومپانيا 2013 جىلعى 29 ناۋرىزدا ەلوردادا قوناەۆ كوشەسى، 12/1-دە تىركەلدى. ول 31-دەن 40 ادامعا دەيىن جۇمىس ىستەيتىن شاعىن كاسىپورىن رەتىندە ەسەپتەلەدى.
ۇيىمدا بىرنەشە قىزمەت تۇرلەرى بار: قاۋىپتى قالدىقتاردى وڭدەۋ جانە جويۋ، جاراتىلىستانۋ جانە تەحنيكالىق عىلىمدار سالاسىنداعى زەرتتەۋلەر مەن ازىرلەمەلەر، اقپاراتتىق تەحنولوگيالار مەن اقپاراتتىق جۇيەلەر سالاسىنداعى قىزمەتتەر.
نەگىزگى ميسسياسى – قورشاعان ورتانى ساقتاۋ، قالپىنا كەلتىرۋ جانە ساپاسىن جاقسارتۋ بويىنشا جاعداي جاساۋ.
كاسىپورىننىڭ قارجىلىق جاعدايى تۇسىنىكسىز. 2011 جىلعا دەيىن سالىق شەگەرىمدەرى وتە جوعارى بولعان، سودان كەيىن ۇيىم «جاسىل دامۋ» سەرىكتەستىگى بولىپ قالىپتاسا باستاعان تۇستا ولار كۇرت تومەندەگەن. بىراق سوڭعى جىلدارى بيۋدجەتكە تۇسەتىن تۇسىمدەر ارتىپ كەلەدى. جاعدايى جاقسى بولىپ كورىنگەنىمەن، pk.uchet قىزمەتىنىڭ مالىمەتىنشە، كومپانيا بيۋدجەتكە سالىق پەن كەدەندىك تولەمدەر بويىنشا 635 939 تەڭگە قارىز.
كومپانيانى بۇرىن قوستاناي وبلىسى بويىنشا ەكولوگيا دەپارتامەنتىنىڭ باسشىسى بولعان ازامات الىمباەۆ باسقارادى. سونداي-اق ول بۇرىن ەكولوگيالىق رەتتەۋ جانە باقىلاۋ كوميتەتى توراعاسىنىڭ ورىنباسارى بولىپ جۇمىس ىستەدى.
«ادىرنا» ۇلتتىق پورتالى
