كەشە، 15 قاڭتاردا پەتروپاۆلدا ءىرى ساۋدا ورتالىقتارىنىڭ ءبىرى ەۆاكۋاتسيالانىپ، نىساندى پوليتسەيلەر قورشاۋعا الدى، دەپ حابارلايدى "ادىرنا" ۇلتتىق پورتالى "Petropavlovsk.news"-كە سىلتەمە جاساپ.
قاڭتاردىڭ 15-ءى كۇنى كەشكە "Dostyq Mall" ساۋدا ورتالىعىنا كەلۋشىلەردى عيماراتتان كەتۋدى سۇراعان. ساعات 22.45 شاماسىندا تولىق ەۆاكۋاتسيالاۋ جۇرگىزىلگەن: كەلۋشىلەر مەن جۇمىسشىلار عيماراتتان شىعارىلعان. پوليتسيا قورشاۋ ورناتقان.
ءبىر جارىم ساعاتتىڭ ىشىندە ساۋدا ورتالىعىنىڭ عيماراتىندا تەك قۇقىق قورعاۋ ورگاندارىنىڭ وكىلدەرى عانا بولدى. ولار عيماراتتان جارىلعىش زاتتى ىزدەگەن.
— كەشە قۇقىق قورعاۋ ورگاندارىنا "Dostyq Mall" ساۋدا ويىن-ساۋىق ورتالىعىنا مينا قويىلعانى تۋرالى اقپارات ءتۇستى. وقيعا ورنىندا بارلىق توتەنشە جاعدايلار قىزمەتى جۇمىس ىستەدى. ساۋدا ورتالىعىنىڭ عيماراتىن تەكسەرۋ كەزىندە جارىلعىش زات تابىلماعان. قازىرگى ۋاقىتتا لاڭكەستىك اكتىسى تۋرالى جالعان حابارلاما جاساعان كۇدىكتىنى انىقتاۋ بويىنشا جەدەل-ىزدەستىرۋ شارالارى جۇرگىزىلۋدە، — دەپ حابارلادى سقو پوليتسيا دەپارتامەنتىنىڭ ءباسپاسوز قىزمەتى.
"ادىرنا" ۇلتتىق پورتالى.
