الماتى تۇرعىنى ءلايلىم ابىلداەۆا قازاقستاننىڭ قۇقىق قورعاۋ ورگاندارىنا جۇگىندى. ونىڭ كۇيەۋى تيمۋر كيم قالاداعى تارتىپسىزدىكتەردەن كەيىن ۇستالعان. Tengrinews.kzءتىلشىسى بەرگەن سۇحباتىندا ايەل وقيعانىڭ ءمان-جايىن ايتىپ بەردى.
ابىلداەۆانىڭ ايتۋىنشا، 9 قاڭتاردا كەشكى ساعات 19.00 شاماسىندا بەتپەردە كيىپ، قولىنا اۆتومات ۇستاعان ونشاقتى ادام ۇيگە باسىپ كىرىپ، ءۇش بالانىڭ كوزىنشە كۇيەۋىن ۇرا باستاعان.
"8 جاسار قىزىم، 6 جاسار ۇلىمنىڭ كوزىنشە ۇرا باستادى. مەن 3 ايلىق قىزىمدى تاماقتاندىرىپ وتىرعانمىن. بالالار، سونىڭ ىشىندە مەندە دە كۇيزەلىس بولدى، بۇل ۇمىتىلمايدى. كۇيەۋىمدى بەلگىسىز جاققا الىپ كەتتى. ءبىر كۇننەن كەيىن قولىنا كىسەن سالىپ، بارلىق پوليتسيا قىزمەتكەرىمەن پاتەردى تىنتۋگە كەلدى. سول كەزدە الماتى پد ەكەنىن بىلدىك. ءتۇنى بويى ۇرىپ-سوعىپ، مازاق ەتكەنىن ايتتى. كيىمى قان-قان، جىرتىلعان. كيىمىن اۋىستىرۋعا رۇقسات بەردى. ولار تىنتۋگە كەلگەندە، تەرگەۋشىنىڭ سوزىنەن وعان لاڭكەستەرگە كومەكتەستى دەگەن ايىپ تاعىلعانىن بىلدىك. ول اق ءتۇستى Mitsubishi Delica كولىگىندە قارۋ تاراتقان دەلىنەدى، تەرگەۋ بارىسىندا ءۇش ادام ونى نۇسقاپ تۇرعانى بەلگىلى بولدى. ال بۇل قاتەدەن باسقا ەشتەڭە ەمەس، قىزمەتكەرلەردىڭ ايتۋىنشا، ول ىزدەۋدە جۇرگەن باسقا ادامعا ۇقسايدى", - دەدى ايەلى.
سونداي-اق، ءلايلىم ابىلداەۆا 5 قاڭتاردا ميتينگىلەر كەزىندە كۇيەۋى مەن اعاسى اسكەريلەرگە، پوليتسيا قىزمەتكەرلەرىنە جانە بەيبىت تۇرعىندارعا كومەك كورسەتۋ ءۇشىن ساعات 19:00 شاماسىندا Nissan Murano كولىگىمەن الاڭعا قاراي بارعانىن ءتۇسىندىردى. بىرنەشە كۇن بۇرىن ونىڭ اعاسى، بۇرىنعى پوليتسيا قىزمەتكەرى تارتىپسىزدىكتەر كەزىندە زارداپ شەككەن پوليتسەيلەرگە كومەكتەسكەن.
"5 قاڭتاردا ساتباەۆ كوشەسىمەن رەسپۋبليكا الاڭىنا قاراي كەلە جاتىپ، ولار قاۋىپسىز جەرگە توقتاپ، نارازىلىق بىلدىرۋشىلەر توبىن كورىپ، قورقىپ، ۇيلەرىنە قايتۋدى ۇيعارعان. ۇيگە قايتىپ كەلە جاتىپ، "الماتى" باقىلاۋ-وتكىزۋ بەكەتى جانىنان وتكەندە مەملەكەتتىك ءنومىرى جوق بەلگىسىز قارا كولىك ولاردى توقتاتىپ، ىشىنەن 4-5 ادام شىققان. ولاردى كولىكتەن كۇشتەپ شىعارىپ، كولىكتى تىنتە باستاعان. جۇكسالعىشتى اشۋعا ماجبۇرلەگەن، سودان كەيىن قاراپايىم ازاماتتار ەكەنىنە كوز جەتكىزىپ، ولاردى جىبەرگەن. ودان ءارى قورقىپ، ۇيلەرىنە قايتقان. جولدا اعامدى ۇيىندە قالدىرىپ، كەشكى ساعات 21.00 شاماسىندا ۇيگە كەلدى. سودان كەيىن ول ەشقايدا كەتپەدى", - دەدى ول.
الماتى پوليتسيا دەپارتامەنتى ەر ادام قازاقستان رەسپۋبليكاسى قىلمىستىق كودەكسىنىڭ 255-بابى 4-بولىگى ("تەرروريزم اكتىسى") بويىنشا قىلمىس جاسادى دەگەن كۇدىككە ىلىنگەنىن ءتۇسىندىردى. ول ۋاقىتشا ۇستاۋ يزولياتورىنا قامالعان. تەرگەۋ سوتى سانكتسياسى بەرگەن.
"بۇل وقيعالارعا كۇيەۋىم مەن اعام قاتىستى بولسا، نەگە باسقالار سياقتى كولىك ءنومىرىن شەشپەدى. اسىرەسە كۇيەۋىم ۇستالعان سوڭ اعام الماتى قالالىق پوليتسيا دەپارتامەنتىنە ءوز ەركىمەن باردى، ودان جاۋاپ الىپ، بوستاندىققا جىبەردى. ول كۇيەۋىم كىناسىز ەكەنىنە كۋا. ءبىزدىڭ وتاۋ قۇرعان جىلدارى ول ەشقاشان اگرەسسيا كورسەتپەدى، ونىڭ مەيىرىمدى، جاناشىر، ادال ادام ەكەنىن ءبارى بىلەدى. قۇقىق قورعاۋ ورگاندارىنا ەش قارسىلىعىم جوق. بىراق كۇيەۋىمنىڭ ءىسىن جان-جاقتى جانە ءادىل تەكسەرۋدى سۇرايمىن. ول وتباسىنداعى جالعىز اسىراۋشى", - دەدى ابىلداەۆا.
“ادىرنا” ۇلتتىق پورتالى
Басқалармен бөлісе отырыңыз
