اقتوبە وبلىسىندا ءىرى كاسىپورىندار جۇمىسشىلاردىڭ جالاقىسىن كوتەرە باستادى، دەپ حابارلايدى جەرگىلىكتى موي گورود پورتالى.
ايماقتاعى ميتينگتەر كەزىندە ءىرى كاسىپورىنداردىڭ جۇمىسى توقتاپ تۇردى. سونىڭ ىشىندە اقتوبە مىس كومپانياسى، "قازحروم" مەن "سپنس-اقتوبەمۇنايگاز" بار. نارازىلىق اكتسيالارى باستالعاننان كەيىن ارنايى كوميسسيا قۇرىلعان بولاتىن.
اقتوبە وبلىسى اكىمىنىڭ ورىنباسارى رۋسلان قامباروۆتىڭ ايتۋىنشا، ءىرى كاسىپورىندار 2-3 كۇندەي جۇمىس ىستەمەي تۇرعان. سونىڭ ءوزى ەكونوميكالىق كورسەتكىشتەرگە ءبىرشاما اسەر ەتتى. جۇمىسشىلار جولدى جاپقاننان كەيىن كولىك قاتىناسى مەن جۇك تاسىمالى توقتادى.
"جۇمىس بەرۋشىلەر مەن جۇمىسشىلار اراسىنداعى داۋ-داماي شەكتەن شىعىپ كەتتى. ادامدار تەمىر جولدى جانە تاس جولدى جابا باستادى. ونداي جاعداي كاسىپورىنداردىڭ جۇمىسىنا عانا ەمەس، جالپى، تەمىرجول مەن كولىك قاتىناسىنا كەرى اسەر ەتتى. قالالار اراسىنداعى قاتىناس توقتاپ قالدى. ماسەلەن، سامارا-شىمكەنت تاس جولىندا حرومتاۋعا جاقىن جەردە ۇلكەن كەپتەلىس بولدى", - دەيدى قامباروۆ.
بۇدان بولەك، ميتينگكە قاتىسۋشىلار اقتوبە - استراحان، قارابۇتاق - قوستاناي، قاندىاعاش – ەمبى تاس جولدارىن جاۋىپ تاستادى. نارازىلىق ءبىلدىرۋشى توپ جالاقىنى كوتەرۋدى تالاپ ەتتى.
"وسى ايدان باستاپ 25 مىڭ جۇمىسشىنىڭ جالاقىسى ورتاشا ەسەپپەن 25 پروتسەنتكە وسەدى. اقتوبە مىس كومپانياسى، "كوپپەر تەحنولودجي" مەن "قازگەورۋد" بار، ول جەردە، شامامەن، ەكى مىڭ ادام ىستەيدى، جالاقى 20 پروتسەنتتەن 50-گە دەيىن كوتەرىلەدى. ايماقتاعى ءىرى مۇناي كومپانياسى - "سپنس-اقتوبەمۇنايگازدا" 25 پروتسەنتكە، ال "قازحرومدا" جالاقى 10 پروتسەنتتەن 35-كە دەيىن ارتادى", - دەدى اكىمنىڭ ورىنباسارى.
قامباروۆ باسقا كومپانيالارمەن كەلىسسوز جۇرگىزىلىپ جاتقانىن دا جەتكىزدى.
”ادىرنا” ۇلتتىق پورتالى
