Shymkent qalasyndaǵy Turan shaǵyn aýdanynda byltyrǵy jyldan qurylysy ótpeli 41 turǵyn úıdiń qurylysy jalǵasýda. Páter sany 2432 bolatyn úı jyl qorytyndysymen paıdalanýǵa berilmek.
«Nurly jer» memlekettik baǵdarlamasy aıasyndaǵy kópqabatty turǵyn úılerdiń qurylys barysyn búgin qala ákimi Murat Áıtenov aralap kórdi. Óz baıandamasynda, qalalyq qurylys basqarmasynyń basshysy Á.Rabaev qurylys materıaldardyń otandyq ónim úlesi 91 paıyzdy quraıtynyn málimdedi.
Merdigerlermen kezdesken shahar basshysy turǵyndar úshin baspana sapasy mańyzdy ekenin aıtyp, jumystyń qarqyny men sapasyn nazarda ustaýdy tapsyrdy.
«Memleket basshysy Qasym-Jomart Toqaev halyqty baspanamen qamtý máselesin jiti nazarda ustaıdy.
Bul baǵytta elimizde arnaıy baǵdarlamalar ázirlendi. Kezekte turǵan azamattardy turǵyn úımen qamtý úshin turǵyn úıler kóptep salynýda. Búginde qalamyzda 43 myńnan astam adam kezekte tur. Sondyqtan úılerdiń qurylysyn jedeldetýimiz kerek. Qurylys jumystaryn úzdiksiz júrgizý úshin de Shymkenttiń aýa
raıyda yńǵaıly. Qajet bolsa, túıtkildi máselelerdi shuǵyl sheshý úshin apta saıyn kezdesip otyraıyq»,- dedi M.Áıtenov.
Sonymen qatar, qurylys aýmaǵynyń tazalyǵyna kóńil bólýdi, árkim óz jumysynda basqasynyń eńbegin baǵalaý kerektigin aıtty.
«Nurly jer» memlekettik baǵdarlamasy sheńberinde Turan shaǵyn aýdanyndaǵy 25, 26, 28, 29 oramdarda bıýdjet esebinen 88 úıdiń qurylysy josparlanǵan. Onyń ishinde 47 úı, ıaǵnı 3144 páter 2020-2021 jyly paıdalanýǵa berilgen.
Osy jyly atalǵan shaǵyn aýdanda jalpy 2700 páterli kópqabatty 50 turǵyn úıdiń qurylysy bastalady.
Qazir jobalaý-smetalyq qujattamasy ázirlenýde.
Shymkent qalasy ákimdiginiń baspasóz qyzmeti
