Búgin Atyraýda 145 mıllıon teńgelik eskertkish saltanatty túrde ashylýy kerek. Bıýdjet qarjysynyń jumsalýy týraly jazatyn Rrotenge jobasy eskertkish aınalasyndaǵy daýǵa qatysty tyń derek jarııalady, dep habarlaıdy "Adyrna" ulttyq portaly qamshy.kz-ke silteme jasap.
Joba málimetinshe, osydan eki jyl buryn týra osyndaı eskertkish Pavlodarda turǵyzylǵan. Eskertkishti Atyraýdaǵy daýly iste aty atalǵan merdiger – "Balqytý" JShS jasaǵan. Alaıda ol joly joba quny shamamen úsh ese arzanǵa – 55 mıllıon teńgege baǵalanǵan. Al Atyraýda ashylatyn eskertkish smetasy 145 mıllıon teńgege teń.
Qoladan jasalǵan eskertkishtiń bıiktigi – 11 metr (tuǵyry– 5,75 metr), salmaǵy – 5 tonna.
10 jeltoqsanda Atyraý oblysy ákiminiń orynbasary Baqytgúl Hamenova men oblystyq mádenıet basqarmasynyń basshysy Aqylbek Rysqalıev Abaı eskertkishin ornatýǵa memlekettik satyp alý shartyn jasaǵany úshin 4,5 mıllıon teńge kóleminde para aldy degen kúdikpen ustalǵan.
Hamenova 12 jeltoqsanda úıqamaqqa jiberilip, alaıda 22 jeltoqsanda tergeý ızolıatoryna eki aıǵa qamalǵan.
Eger B.Hamenovanyń qylmysy dáleldense, onyń múlki tárkilenip, 7 jyldan 12 jylǵa deıin bas bostandyǵynan aıyrylýy múmkin.
Eks-sheneýnik Hamenova mánsap jolynda birden órlep, qarapaıym kolledj dırektorynan depýtat bolyp ketkenin Nursultan Nazarbaevty maqtaǵan áreketimen baılanystyratyndar kóp. Ol 2016 jyly 30 qańtarda Kaspıı óńiriniń qazirgi zamanǵy kolledjiniń dırektory bolyp turǵan kezde "Nur Otan" partııasynyń kezekten tys HVII sezinde elbasyǵa alǵys aıtyp, óleń oqyǵan.
"Kókjıekten arǵy jaqty kóretin,
El-jurtyna sheksiz qýat beretin.
Soqsadaǵy zamananyń daýyly,
Barsha halqy tek sońynan eretin.
Elbasyndaı eren tulǵa turǵanda,
Men elimniń erteńine senemin" degen shýmaqtardan keıin uzamaı 24 naýryzda Hamenova májilis depýtaty atanady.
Al 2020 jylǵy 13 naýryzda Atyraý oblysy ákiminiń orynbasary laýazamyna taǵaıyndalǵan.
"Adyrna" ulttyq portaly
