Týra Táýelsizdik kúni Almatyda 106 sábı dúnıege keldi. Tarıhy tereń bul kúnde týǵan ul jáne qyz balalardyń sany teńdeı. Bul týraly “Adyrna” ulttyq portaly Almaty telearnasyna silteme jasap habarlaıdy.
Sonyń biri Almatylyq Samal Júrsinbaı. 16 jeltoqsanda Samal alǵash ret ana atandy. Azattyqtyń aq tańyna oraı ulynyń esimin Qaırat atady. Rysqulbekovteı ultjandy, batyr bolsyn degen ata-ana tilegi jerde jatpaıdy.
«Osy 16 jeltoqsanda dúnıege kelgendikten, ózimizdiń qaharman Qaırat atamyzdyń atyn berip otyrmyz. Táýelsiz memleketimde osylaı balamdy qolyma alyp otyrǵanyma óte qýanyshtymyn. Balamyzdyń salmaǵy 2 keli 100 gramm boldy», – deıdi qala turǵyny Samal Júrsinbaı.
Balasyn baýyryna alǵan ana qalalyq №2 perzenthananyń dárigerlerine sheksiz rıza. Munda 16 jeltoqsan kúni 14 bala ómirge kelipti. «Osyndaı qýanyshty da qobaljýly sátterdi esh alańsyz bastan keshirýdiń ózi bir baqyt. Bul da Táýelsizdiktiń tartýy» deıdi analar.
«Erekshe sezim árıne boldy. Sebebi Qazaqstan Táýelsizdiktiń besiginde terbelip jatqan jas memleket qoı. Táýelsizdiktiń týyn jelbiretetin kishkentaı sábılerdi merekelik kúnde, Táýelsizdigimizdiń 30 jyldyǵynda ómirge ákelip otyrǵanyma shynymdy aıtsam, óte qatty qýanyshtymyn», – deıdi jas ana Aqerke Shahan.
«Dárigerlerdiń kómegimen jeńil ótti. Ekinshi balam – ul. Qazaqstan Táýelsizdiginiń 30 jyldyǵyna oraı Alla taǵala ul berdi. Shúkir. Qatty qýanyp, tolqyp turmyn», – deıdi taǵy bir jas ana Qarakóz Tarǵynova.
Mereıtoıǵa oraı medıına mekemesi analarǵa shaǵyn kádesyılar tabys etti. Dárigerler ana bolýdyń alǵyshartynan bastap, bosanǵannan keıin de áıelderdiń jaǵdaıyna erekshe kóńil bóletinin aıtady.
«Qala boıynsha kúndelikti orta eseppen 100-den 120 balaǵa deıin dúnıe esigin ashady. Onyń ishinde shala týylǵan, egiz, aıy-kúni jetken náresteler bar. Jańa týǵan sábı men analardyń jaǵdaıy jaqsy», – dedi №2 qalalyq perzenthana bas dárigeriniń orynbasary Nazgúl Imanǵalıeva.
“Adyrna” ulttyq portaly
