Aqtaý men qalaǵa jaqyn mańdaǵy aýyl turǵyndaryn jylý jáne gazben qamtamasyz etýge Úkimet rezervinen 3,7 mlrd teńge bólinedi, dep habarlaıdy «Adyrna» tilshisi Premer-mınıstrdiń baspasóz qyzmetine silteme jasap.
«Úkimet «Jańaózen – Aqtaý» gaz qubyrynan avtomattandyrylǵan gaz taratý stansasy ornatylatyn magıstraldyq gaz qubyry qurylysyn aıaqtaý úshin óz rezervinen 3 mlrd 695 mln 925 myń teńge bóledi. Premer-Mınıstr Álıhan Smaıylov tıisti qaýlyǵa qol qoıdy.
Búginde Aqtaýdyń soltústik bóligi qarqyndy damyp keledi. Atap aıtqanda, kóp qabatty turǵyn úıler men áleýmettik nysandar qurylysy júrip jatyr. Bıyl qalanyń keńeıip kele jatqan bóligin jylýmen qamtý maqsatynda birqatar blok-modýldi qazandyqtardy ornatý jáne eki jańa qazandyq salý josparlanǵan. Jańa qýat kózderi gazben jumys isteıtin bolady, osyǵan baılanysty tıisti ınfraqurylymdy keńeıtý qajet»,—delingen habarlamada.
Aıta keteıik, jalpy uzyndyǵy 52 shaqyrym bolatyn jańa gaz qubyry Aqtaý qalasynyń jańa shaǵyn aýdandary, Munaıly aýdanyndaǵy Qyzyltóbe, Dáýlet, Baıandy aýyldary, sondaı-aq Túpqaraǵan aýdanyndaǵy Aqshuqyr men Saıyn Shapaǵatov aýyldarynyń 150 myńǵa jýyq turǵynyn jylýmen jáne taýarlyq gazben qamtamasyz etedi.
Joba qurylysy Kaspıı energetıkalyq habynyń syrtqy ınfraqurylymyn damytý aıasynda júrgizilip jatyr.
