Belgili kásipker Serik Tólbasovtyń qory Maılyqoja kóshesi №17 kópqabatty úıdiń turǵyndaryna jańa sporttyq alańshasyn tartý etti. Munda azamattardyń sportpen aınalysýy úshin uzyndyǵy 24 metr, eni 12 metr bolatyn kópfýnkıonaldy sport alańy salynǵan. Odan bólek, munda sporttyq qurylǵylar ornatylǵan workout aımaǵy da qarastyrylǵan. Endi aýla turǵyndary jyl on eki aı osy alańqaılarda dene jattyǵýlarymen aınalysa alady.
Saltanatty jıynǵa qatysqan qala ákiminiń orynbasary Maqsut Isahov, sondaı-aq Serik Tólbasov qorynyń dırektory Zýhra Orazova, TS DEVELOPMENT zań máseleleri jónindegi dırektory Baýyrjan Seralın turǵyndar men jas sportshylardy jańa nysannyń ashylýymen quttyqtap, sáttilik tiledi.
– Táýelsizdiktiń 30 jyldyǵyna oraı Memleket basshysynyń buqaralyq sportty damytý, balalarǵa sporttyq ınfraqurylymnyń barynsha qoljetimdi bolýyn qamtamasyz etý tapsyrmasyna sáıkes, qalada kóptegen sport nysandary ashylyp, turǵyndar ıgiligine berilýde. Bul baǵytta memlekettik-jekeshelik áriptestik aıasynda da birqatar shaǵynaýdandarda sport klýbtary jumys isteýde. Búgingi kúni buqaralyq sportty damytý, salaýatty ómir saltyn nasıhattaý maqsatynda qalada 115 sport alańshasyn salý josparlanǵan. Onyń ishinde 15 sporttyq nysan demeýshiler esebinen boı kóteredi. Serik Tólbasov qoryna aıtar alǵysym sheksiz, - dedi Maqsut Pernebaıuly.
Óz kezeginde turǵyndar balalardyń ýaqytyn tıimdi ári qaýipsiz ótkizýge sebep bolarlyq osyndaı nysandy salyp bergenderi úshin demeýshilerge alǵys aıtyp, rızashylyǵyn jetkizdi. Al, jıynǵa qatysqan balalarǵa syılyqtar úlestirildi.
A. JÁDIGERULY
