Búgin Shymkent qalasy Qarataý aýdanyniń ákimi Abzal Áliqulov «Instagram» paraqshasynda ótken tikeleı efırde jyl basynan beri atqarylǵan jumystardy baıandady. Aýdan ákimi ınfraqurylymmen qamtý týraly aıtty.
Aýdan aýmaǵynda 24 shaǵynaýdan men eldi meken ornalasqan. Ondaǵy negizgi ózekti máseleniń biri – ınfraqurylym. Búginde 7 eldi meken aýyz sýmen, 7 eldi meken elektr jaryǵy, 2 eldi meken tabıǵı gazben qamtylmaǵan.
A.Áliqulov óz baıandamasynda bıyl Tassaı, Turan, Dostyq, Azat, Asar-2, sh/a men Dostyq turǵyn alabynda sapaly sý tartý úshin qurylystyń aıaqtalǵanyn jáne búginde abonentteý jumysy júrgizilip jatqanyn aıtty. Nurtas sh/a qurylys 2022 jylǵa ótpeli. Al, Qaınar bulaq turǵyn alabynda jobalaý jumysy jasalynýda.
Elektr qýatymen qamtýda birqatar jumystar atqarylǵan. Turan, Tassaı, Dostyq, Asar-2 sh/a qurylys aıaqtalǵan. Qaınar bulaq turǵyn alabyna elektr qýatyn jetkizý keler jylǵa ótpeli. Qurylysy aıaqtalǵan eldi mekenderge jaryq berilse qamtý kórsetkishi 93 % quraıdy, al 2022 jyly 100 paıyzǵa jetpek.
Aýdan halqynyń 72,8% tabıǵı gazben qamtylǵan. Bıyl Qaınar bulaq turǵyn alaby úshin magıstraldy qubyr tartyldy. Búginde turǵyn alap pen saıajaıdyń ishki júıesin júrgizý úshin jobalaý jumysy júrgizilýde. Sonymen birge, Dostyq, Asar-2, Azat sh/a ishki júıeleriniń qurylysy aıaqtalyp otyr.
Bıyl aýdandaǵy 15 eldi mekende 54,4 shaqyrymdy quraıtyn 38 kóshege ortasha jóndeý jumystary atqarylsa, 34,7 shaqyrymdy 37 kóshege jóndeý jumystary júrgizilýde.
Efır barysynda aýdan ákimi turǵyndar joldaǵan 50-ge jýyq suraqqa jaýap berdi. Suraqtardyń deni ınfraqurylym tóńireginde boldy.
Shymkent qalasy ákimdiginiń baspasóz qyzmeti
