...Aqyldy balaqaılardyń záresin alǵan alyp Dııýmen aıqasýǵa bel býǵan Aldarkóse ábjil «Órmekshi adam» men júırik Makkýın jáne mazasyz Masha qyzben kúsh biriktirýi múmkin be? Ábden múmkin eken...
Ákeler oqyǵan ertegi keıipkeri men balalar tanymyndaǵy komıks beınelerdiń basyn qosatyn sahnalyq qoıylymnan keıin kishkentaı kórermender osyndaı oı túıetini anyq. Biz sóz etip otyrǵan sahnalyq sıýjet M.Álibektiń «Aldarkóseniń sıqyrly dúrbisi» atty ertegisiniń jelisimen qoıylǵan mınıspektaklde kórinis tapqan. Ári bul erteginiń alystaǵy aýyldyń shaǵyn teatrynda qoıylýynyń ózi bir qyzyq emes pe? Eńbekshiqazaq aýdanyndaǵy Qarakemer aýylyndaǵy balalar teatry kelýshilerine kóterińki kóńil kúı syılap, sahna kórkin keltirip otyr osylaısha. «Qarakemer» balalar teatrynyń jetekshisi Jarqyn Baraqbaev sahnalaǵan ertegi alǵash Jańa jyldyń qarsańynda qoıylǵan edi. Kishkentaı kórermen kóp jınaldy. Teatr ujymy qazir kórshi aýyldyń turǵyndarynan ótinish túsip, ertegini tamashalaýǵa nıetti balalardyń qatary kóbeıgendikten qoıylymdy qaıtalap kórsetýge kiristi. 2015 jyly oblys ákiminiń qoldaýymen ashylǵan «Qarakemer» balalar teatry aýdanǵa ǵana emes, aımaqqa belgili óner ujymy. «Jurt dán rıza, ásirese balalardyń qýanyshyn kórseńiz... Bastapqyda belgili óner maıtalmany Asqar Naımantaevtyń ustazdyq etýimen bir top talapty balalardyń basyn qosyp teatr qurdyq. Oblys ákimi qýana qoldady. Qazir kásibı ujymǵa aınaldyq. Jas rejısser Jarqyn Baraqbaevtyń jetekshiligimen teatr repertýary tolyqty», deıdi Qarakemer aýyldyq mádenıet úıiniń dırektory Araılym Mamyrbekqyzy.
Qalmahanbet MUQAMETQALI,
«Egemen Qazaqstan» Almaty oblysy
