Shymkentte balalary úıinen qýyp jibergen 75 jastaǵy ájeıdi kórshileri dalada qańǵyp júrgen jerinen taýyp aldy, dep habarlaıdy “Adyrna” ulttyq portaly otyrar.kz saıtyna silteme jasap.
Salamat Rahmanqyzynyń jasy 75-te. Shymkentte týyp-ósken ájeı bar ómirin medbıkelik qyzmetke arnaıdy. Kúıeýi qaıtys bolǵan soń, bes balany jalǵyz ózi baǵyp-jetildirgen. Keıin úıin satyp, jalǵyz uly men qyzdaryna aqshasyn bólip beredi.
Al ózi úlken qyzynyń qolynda ýaqytsha turǵan. Keıin qyzymen sózge kelip qalǵanda, tuńǵyshy úıden qýyp jiberedi.
- Kúıeýim ómirden ótken soń, bárin ózim aıaqqa turǵyzdym. Joǵary bilim aldy barlyǵy. 90-jyldary qıyndaý bolsa da, birneshe jerde jumys istep, baǵyp-qaqtym. Ósken soń bári bólek ketti. Úıde jalǵyz qalǵan soń, baspanany satyp, balalarǵa aqshasyn bólip berdim. Ne ómirim qaldy deısiń, balalardyń qolynda tura turarmyn dep oıladym, — deıdi Salamat Balabaeva.
Qartaıǵanda balalarynan qyzyq kórmegen keıýana úlken qyzymen urysyp qalǵan soń, kóshe kezip ketedi. Birneshe kún boıy dalada júrgen ájeıdi burynǵy kórshileri taýyp alyp, daǵdarys ortalyǵyna alyp kelgen.
- Ájeı úlken soqqy alǵan. Eki kún boıy kóshede qaraýsyz júrgen soń, bul ómirden ketkisi kelgenin de jasyrmaıdy. Týǵan balalary qýyp shyqqan soń, eldiń betine qalaı qaraımyn degen oı qajap tastaǵan. Jalǵyz uly da anasyna qaramaıdy. Sebebi, kelini enesimen birge turǵysy kelmeıdi, — deıdi «Kómek» daǵdarys ortalyǵynyń dırektory Malıka Júsipova.
Salamat Balabaeva úlken qyzynyń úıine qaıta barǵan. Alaıda, qyzy úıdi satyp, kóship ketkeni belgili boldy. Búginde Salamat ájeıdiń daǵdarys ortalyǵynda júrgenine eki aı toldy.
Ol munda túrli qıyndyqtarmen túsken jas analarǵa kómektesip, balalaryn baǵysyp, aqylyn aıtyp otyrady.
”Adyrna” ulttyq portaly
