QR Táýelsizdiginiń 30 jyldyǵy qarsańynda úshinshi megapolıste kezekti elektr stanııasy iske qosyldy. Qalanyń ınfraqurylymy úshin mańyzdy strategııalyq nysannyń resmı ashylý saltanatyna qala ákimi Murat Áıtenov, qalalyq máslıhattyń hatshysy Bahadyr Narymbetov, energetıka jáne ınfraqurylymdy damytý basqarmasynyń basshysy Boranbaı Bolatbekov jáne jaýapty mamandar men jergilikti turǵyndar qatysty.
Memleket basshysynyń tapsyrmasymen búgingi tańda Shymkent qalasyn sapaly elektr qýatymen qamtý jospary iske asyrylýda.
– Shymkent qalasyn sapaly elektr qýatymen qamtý – mańyzdy mindet. Qalanyń energetıka salasyn keshendi túrde jańǵyrtý bastamasy qolǵa alyndy. Bes jylda 10 qosalqy elektr stanııasy salynady. Bıyl «Bozaryq» qosalqy stanııasy iske qosyldy. Búgin «1-M-1» stanııasy jumysyn bastap otyr. Bul joba 4 eldimekenniń 70 myńǵa jýyq turǵynyn sapaly elektr qýatymen qamtýǵa múmkindik beredi, – dedi Murat Dúısenbekuly.
Qurylysy 2019 jyly bastalǵan "1-M-1" qosalqy elektr stanııasynyń qýaty qalanyń Asar-2, Soltústik saıajaı, Qaınarbulaq jáne Dostyq shaǵynaýdandarynyń turǵyndaryn sapaly elektr jaryǵymen qamtamasyz etýge múmkindik beredi. Bul keshen 110 kV jeli arqyly «Bozaryq» stanııasynan qýat alady.
Qurylysyn «Elektromontaj» AQ júrgizgen keshen zamanaýı elektr quraldarymen jabdyqtalǵan. Qosalqy elektr stanııasynyń iske qosylýymen Asar-2 shaǵynaýdanyndaǵy 2765 abonentke sapaly elektr qýaty berildi. Al Soltústik saıajaı, Qaınarbulaq, Dostyq eldimekenderine sapaly elektr energııasy ishki oramdyq jeliler qurylysy aıaqtalǵannan keıin beriledi.
