Qyrkúıek aıynda Shymkent qalasyndaǵy barlyq orta bilim beretin mekemelerde Táýelsizdiktiń 30 jyldyǵyna oraı «Táýelsizdik jetistigi» taqyrybynda synyp saǵattary men ashyq sabaqtar ótkiziletin bolady.
Jas urpaqqa táýelsizdiktiń syrly tarıhy men qasıetin túsindiretin joba aıasyndaǵy alǵashqy tárbıe saǵaty jalpy bilim beretin №137 orta mektepte bastaý aldy.
Ashyq sabaqta 30 jyl ishinde jetken jetistikter men elimizdiń saıası-áleýmettik jaǵdaıy, mádenı-rýhanı qundylyqtar sondaı-aq tarıh, bilim týrasynda sóz etildi. Kezdesýge ardager ustaz Nyshanbek Baıǵutov, «Shymkent qalasynyń áıelder keńesi» qoǵamdyq birlestiginiń tóraıymy Baıan Jandosova, qalalyq oqý-ádistemelik ortalyǵynyń dırektory Merýert Asqarbekqyzy qatysty.
Ataýly is-sharanyń maqsaty – Táýelsizdiktiń 30 jyldyq mereıtoıynyń mańyzdylyǵyn, egemen eldiń qalyptasý men damý joldaryn urpaq sanasyna sińirý.
Aıta keteıik, ashyq sabaqqa tek muǵalimder men oqýshylar ǵana emes, qalanyń damýyna úles qosqan zııaly qaýym ókilderi de qatysatyn bolady.
Gúldana Dáýren
