Memleket basshysy keshegi Joldaýynda óńirlerdi damytýdyń ulttyq jobasy aıasynda bes jyl ishinde halyqty 100 paıyz taza aýyzsýmen qamtamasyz etýdi tapsyrdy. Shymkent qalasynda osy baǵytta aýqymdy jumystar atqarylýda.
Máselen, qaladaǵy eldi mekenderdi aýyz sýmen qamtamasyz etý maqsatynda bıyl 14 nysannyń qurylys jumystary júrgizilýde. Sapaly aýyz sýmen qamtý boıynsha qurylys jumystarynyń biri «Turan» shaǵyn aýdanynda.
Bul shaǵyn aýdanda aýyz sý júıesin tartý jumystary 2018 jyly merdiger mekeme «Úshsaı» JShS-gimen bastalǵan bolatyn. Jalpy uzyndyǵy 59,8 shaqyrymdy quraıdy. Búginde aýyz sý qubyrynyń qurylysy 100 paıyz aıaqtalyp, qubyrlardy jýyp-shaıý jumystary júrgizilýde. Qyrkúıek aıynyń sońynda «Turan» shaǵyn aýdanyndaǵy 12 600 adam sapaly aýyz sýmen qamtylady. Jalpy atalǵan shaǵyn aýdanda 1745 jeke turǵyn úı men 59 kópqabatty úı bar.
Eske salsaq, 2015 jyly bekitilgen shahardyń bas josparyna saı Turan shaǵyn aýdany qalanyń soltústik bóliginde ornalasqan. Jalpy alańy 1190 gaktardy quraıdy. Shaǵynaýdan batysynda Báıdibek bı dańǵylymen shektesedi, soltústiginde A-2 «Almaty-Termez» avtokólik dálizi jatyr.
Aıta keteıik, osy jyly megapolıste 3 magıstraldy sýaqqy, tasymaldy 7 eldi meken jáne ayzsýdy kestemen paıdalanyp keletin eki eldi mekenniń qurylysy aıaqtalyp, 25,6 myń adam aýyz sýmen qamtylady. Nátıjesinde, qamtylý kórsetkishi 95,6%-dan 98 paıyzǵa óspek.
"Adyrna" ulttyq portaly
