Búgin Shymkent qalasynyń Jumyspen qamtý jáne áleýmettik qorǵaý basqarmasynyń basshysy B.Narbekova Aqparattyq-kommýnıkaııalyq ortalyǵynda ótken baspasóz brıfınginde memleket basshysynyń halyqqa Joldaýyn iske asyrý baǵytynda áleýmettik qorǵaý saıasatynyń júzege asyrylýy men halyqty jumyspen qamtý baǵyttarynyń aǵymdaǵy jyldyń 9 aılyq kórsetkishi týraly baıandady.
Basqarma basshysynyń aıtýynsha, bıyl «Eńbek» memlekettik baǵdarlamasynyń sheńberinde jyl sońyna deıin 33 500 adamdy jumyspen qamtý sharalaryna qatystyrý josparlanyp, naqty 9 aıdyń kórsetkishi boıynsha 19 347 adam jumyspen qamtylǵan.
115 adam «Alǵashqy jumys oryndary» jobasy boıynsha 24 aıǵa joldandy. Al halyqty áleýmettik qorǵaý baǵyty boıynsha 2021 jyldyń I toqsanynda 36 969 otbasyǵa, II toqsanda 30 962 otbasyǵa, III toqsanda 19 333 otbasyǵa memlekettik ataýly áleýmettik kómek tólendi.
Basqarmaǵa qarasty «Shapaǵat» áleýmettik qyzmetter kórsetý ortalyǵy janynan «Ten qogam» áleýmettik keńes berý ortalyǵynda 4224 múmkindigi shekteýli azamattarǵa túrli qyzmet kórsetildi. Onyń ishinde 2099 azamat sanatorıı-kýrorttyq emdelýge joldama alýǵa ótinim bergen bolsa, 1783-i joldamaǵa ıe boldy. «Bastaý bıznes» jobasy boıynsha 1 azamat kásipkerlik negizderine oqytýǵa joldandy. Al psıhologtyń kómegine júgingender sany-20, mindetti gıgıenalyq quraldar alǵandar sany-225 qurap otyr.
Sondaı-aq, basqarma bıyl jyl basynda iske qosylǵan áleýmettik qyzmetter portaly arqyly múmkindigi shekteýli azamattarǵa beriletin tehnıkalyq kómekshi jáne arnaýly júrip-turý quraldarymen qamtamasyz etý boıynsha qyzmet kórsetedi.
Basshynyń aıtýynsha 9 aılyq kórsetkishi boıynsha protezdik-ortopedııalyq kómekke jáne tehnıkalyq kómekshi (ornyny toltyrýshy) quraldarǵa múmkindigi shekteýli azamattardan 5 522 ótinish qabyldanyp, 2 805 quralmen qamtylǵan. Onyń ishinde sýrdotehnıkalyq, tıflotehnıkalyq, gıgıenalyq quraldarmen qatar, múgedekterge arnalǵan qol arbalar berildi. 8 932 azamattan shıpajaı oryndaryna emdelý úshin joldamaǵa ótinishter qabyldanyp, onyń 2 689 azamaty joldama aldy.
Múgedekterge arnaıy jabdyqtalǵan «Invataksı» jáne Uly Otan soǵys ardagerleri men múgedekterine, júrip-turýy qıyn 1-2-shi toptaǵy múgedekterge emdeý mekemelerine jáne qoǵamdyq oryndarǵa aparýǵa arnalǵan «Áleýmettik taksıler» de aýqymdy qyzmet kórsetti.
Shymkent qalasynyń Aqparattyq-kommýnıkaııalyq ortalyǵy
