Jastar saıabaǵynda, týtuǵyr janynda 85 sýretshiniń qatysýymen plener ótti. Olardyń arasynda kásibı mamandar, áýesqoılar, sondaı-aq stýdentter, oqýshylar jáne kórkemóner mektepteriniń oqýshylary atynan jańa bastaǵan sýretshiler bar.
Negizgi mindet - qalanyń kórikti jerleriniń birin salý jáne súıikti qalanyń ásemdigi men sulýlyǵyn qylqalamnyń kómegimen jetkizý.
"20 jyl ishinde bizdiń oblys ortalyǵy tanymastaı ózgerdi. Kóptegen biregeı sáýlet qurylystary salyndy. Biz Taldyqorǵan qalasynyń kórikti jerlerin kásibı jáne jańadan bastaǵan sýretshilerdiń kózimen kórsetkimiz keledi. Al 22 qyrkúıekte qorytyndy shyǵaryp, qurama kórmeni uıymdastyrýdy josparlap otyrmyz", - dep atap ótti Almaty oblysynyń mádenıet, arhıvter jáne qujattama basqarmasynyń basshysy Marlen Kólbaev.
Is-sharaǵa qatysýshylar sýret salýdaǵy kórkemdik stılderdiń alýan túrliligin kórsetti.
"Bizdiń Taldyqorǵan osy jyldar ishinde keremet estetıkalyq kelbetke ıe boldy. Súıikti qalanyń sulýlyǵyn beıneleý biz úshin úlken qýanysh. Búgingi jumysym úshin men ortalyq alańda ornalasqan Taıqazan túrindegi sýburqaqty tańdadym. Men ulttyq elementterdiń zamanaýı sáýletimen úılesimin kórsetkim keledi", - dedi Qazaqstan Sýretshiler odaǵynyń múshesi Eset Dáýrenbaev.
Mundaı plener bolashaq kásibı sýretshiler úshin úlken mańyzǵa ıe. Bul beıneleý óneriniń qyr-syryn jetik meńgergen tájrıbeli sýretshilerden tikeleı sabaq alýǵa múmkindik berdi.
"Men sýret salǵandy unatamyn. Sýret salý úıirmesine besinshi jyl qatysyp kelemin. Búgingi baıqaý úshin bizdiń ádemi jańa teatr tańdadym. Men ol jaqqa jıi baramyn. Men úshin bul eń erekshe ǵımarat. Óz sýretterimde onyń sulýlyǵyn qaıtalaýǵa tyrysamyn jáne meniń jumysym barshaǵa unaıdy dep úmittenemin", – deıdi plenerge qatysýshy 11 jasar Kórkem Qaıratqyzy.
