Oryngúl Arystan – elimizdiń atyn halyqaralyq deńgeıge shyǵaryp, daryny men talantyn birneshe márte dáleldegen zerek oqýshy. Álem chempıony qazirgi tańda nemen aınalysyp júr? Bolashaqta kim bolýdy armandaıdy? Osy jáne ózge de suraqtardyń jaýabyn alý maqsatynda erekshe qabileti bar jaspen tildesip, suqbat qurdyq.
«Kalkýlıator qyz» atanyp ketken arý 2006 jyly Aqtaý qalasynda dúnıege esigin ashqan. 11 jasynda Malaızııa elinde ótken mentaldy arıfmetıka olımpıadasynda I oryndy qanjyǵasyna baılady. Araǵa bir jyl salyp, dúnıejúziniń 150 bilimdi jas matematıgimen birge 30 myń esepti 26 mınýt 26 sekýndta shyǵaryp, álemdik rekord ornatty.
«Bastaýyshta oqyp júrgenimde matematıka páni biraz qıyndyqtardy týdyrdy. Úlgerimimdi jaqsartyp, bilimimdi arttyrý úshin anam meni 3-synypta mentaldy arıfmetıka kýrstaryna qatystyrdy. Bastapqy kezden-aq tez úırenip kettim. Ustazym jyldam esepteýge deıin beıimimdi baıqap, túrli jarystarǵa qatystyra bastady. Oblystyq, respýblıkalyq, halyqaralyq dodalarda baǵymdy synap, chempıon atandym», - dep áńgimesin bastady keıipkerimiz.
Oryngúldiń aıtýynsha, mentaldy arıfmetıka az ǵana ýaqyttyń ishinde ómirine eleýli ózgerister ákelgen.
«Buryn matematıka páni muǵaliminen eskertýlerdi jıi alsam, búginde esep shyǵarýda asa qınalmaımyn. Bul salanyń arqasynda kókjıegimdi keńeıtip, biraz elderdi araladym. Sondaı-aq keremet jandarmen tanystym», - deıdi ol.
Qazirgi tańda jas daryn IT mektep-lıeıiniń 9 synyp oqýshysy. Suqbat barysynda alǵyr arý jańa qyzyǵýshylyǵy bar ekenin de jasyrmady.
– 6-synypta №17 mektepten IT lıeıine aýystym. Oqýym qıyndaı bastaǵan soń, sabaǵyma durys zeıin qoıa bastadym. Aralasatyn ortam da ózgerip, jańa dostar taptym. Bálkim, sodan bolar, qyzyǵýshylyqtarym aýysa bastady. Búginde bımen aınalysamyn, shetel ádebıetin oqımyn. Súıikti kitabym – Hárrı Potter. Keıde sýret salamyn.
Bir qyzyǵy, Oryngúl matematık emes, dáriger bolýdy armandaıdy.
– Bolashaqta bilimdi de bilikti dáriger bolǵym keledi. Sebebi, medıınalyq máseleler kóbeıip ketti. Olardyń sheshimin taýyp, qoǵamǵa paıdamdy tıgizgim keledi. Medıına – óte qyzyq sala. Aldaǵy ýaqytta bilimimdi sheteldik joǵary oqý ornynda jalǵastyrýdy kózdep otyrmyn»,– dep sózin qorytyndylady arý.
«Adyrna» ulttyq portaly
