QR Prezıdenti ákimshiligi basshysynyń birinshi orynbasary Dáýren Abaev «Ashyq dıalog 2» suhbatynyń kezekti sanynda Prezıdent Joldaýynda aıtylǵan beıbit atom bastamasynyń mánin túsindirdi, dep habarlaıdy QazAqparat.
«Prezıdent qaýipsiz ári ekologııalyq atom energetıkasyn damytýdyń múmkindigin zerdeleýdi mindet etip qoıdy. Dál qazir tek zerdeleý máselesi ǵana tur. Eshkim qazir jáne dál osy jerde sheshim qabylda dep otyrǵan joq. Ekinshi jaǵynan kelsek, bárimiz energııamen jabdyqtaý salasynda problema bar ekenin jáne onyń jyl saıyn artyp kele jatqanyn túsinýimiz kerek.
Nege? Óıtkeni eldiń ekonomıkasy, halqynyń sany ósip keledi. Sondyqtan energııamen jabdyqtaý máselesi jyl saıyn ózekti bola túsedi», - degen Dáýren Abaev energııamen jabdyqtaý salasyndaǵy problemalardyń alǵysharttary qazirdiń ózinde sezile bastaǵanyn atady.
«Buǵan eshkimniń daýy joq shyǵar jáne bári túsinip otyrǵan da shyǵar. Óıtkeni ózderi de osy máselemen betpe-bet kelip jatady. Jylytý maýsymdary bul máseleniń bar ekenin kórsetip otyr.
Mysaly, bir óńirde kómir tapshylyǵy paıda bolsa, kelesi óńirde baǵasy sharyqtap jatady. Taǵy bir óńirde elektr úzile beredi degen sııaqty.
Jańa ǵana aıtqanymdaı, tutyný kólemi ósken saıyn bul máseleni zerdelemeı bolmaıdy. Ol máseleni sheshýdiń bir joly – beıbit atom. Prezıdent sondyqtan osy máseleni pysyqtaýdy tapsyrdy», - dedi Prezıdet ákimshiligi basshysynyń birinshi orynbasary.
